Декабрь ойининг иккинчи ярмида Chevrolet Cobalt, Damas, Лабо автомобиллари учун шартнома бериш бошланиши тўғрисида хабар берилганди. Бугун, 18 декабрь куни компаниянинг расмий сайтида узилишлар кузатила бошланди.
Компания хабарига кўра, шартномалар 2024 йилда ишлаб чиқарилиши режалаштирилган автомобиллар учун онлайн тарзда берилади. Сотув бошланишининг аниқ санаси UzAutoMotors расмий саҳифаларида эълон қилиниши, шартномалар One ID идентификация тизимидан рўйхатдан ўтган ҳолда тузилиши эслатилган.
Соат 12:10 ҳолатига кўра, компаниянинг расмий сайтига кириб бўлмаяпти. Мобил иловасида эса “серверга уланиш йўқ”лиги тўғрисида ёзув пайдо бўлган.
UzAuto Motorс фуқаролардан 18 декабрь куни оммабоп автомобилларни харид қилиш учун шартномалар очилиши мумкинлиги бўйича тарқалган маълумотларга ишонмасликни сўради.
“UzAuto Motorс расмий каналларида контрактация бошланишининг аниқ санаси тўғрисида хабар берилади”, — дейилади хабарда.
Эслатиб ўтамиз, UzAutoMotors 4 август куни ишлаб чиқариш линияларида амалга оширилган модернизация ишлари, шунингдек, завод фаолияти самарадорлигининг ошиши ҳисобига 2023 йилда қўшимча 50 000 дона автомобиль ишлаб чиқариш имконияти яратилганини маълум қилган эди. Эртасига, 5 августда эса шартнома бериш тўхтатилгани маълум қилинганди.
Шунингдек, 18-сентябрь куни UzAuto Motorс расмий сайтида кўрсатилган комплектация ва ранглардаги Chevrolet Cobalt, Lacetti, Damas ва Лабо автомобиллари учун контрактация очилди ва кўп ўтмай Cobalt ва Lacetti учун шартнома бериш тўхтатилди.
Изоҳ (0)