Chevrolet автомобиллари Қозоғистонда яна энг кўп сотилган машинага айланди. Бу ҳақда «Forbes.кз» хабар бермоқда.
Қозоғистон автобизнес ассоциацияси маълумотларига кўра, 2022 йил апрель ойида республикада янги енгил автомобиллар сотуви 9212 донани ташкил этди. Бу 2021 йил апрелига нисбатан 8,9 фоизга ва жорий йилнинг март ойига нисбатан 14,3 фоизга кам.
Chevrolet бренди бозор етакчилигига қайтди – апрель ойида ушбу маркадаги 3004 та автомобиль сотиб олинди, бу бир ой олдингига нисбатан қарийб икки марта (+73,8 фоиз) ва бир йил аввалгига нисбатан 13,3 фоизга кўп.
Биринчи чоракнинг аввалги етакчиси Hyundai энг оммабоп брендлар рўйхатида иккинчи ўринни қайд этди — апрель ойида 1802 та автомобиль сотилган. Бу ўтган йилнинг шу даврига нисбатан 21,7 фоизга ва 2022 йилнинг март ойига нисбатан деярли икки баробар (-44,2 фоиз) кам. Қозоғистонда энг кўп сотилган Hyundai — Elantra.
Kia учинчи ўринни эгаллади — апрель ойида сотувлар 968 та автомобилни ташкил этди. Бу ўтган йилнинг шу даврига нисбатан сотувлар ҳажмини 27,2 фоизга оширди. Аммо шу йилнинг мартига нисбатан бу кўрсаткич 23,7 фоиз камайган. Бренднинг апрель ойида энг кўп сотилган автомобиль русуми Sorento кроссовери бўлди – 442 та машина сотиб олинган.
2021 йилда Chevrolet Қозоғистонда энг кўп сотиб олинган автомобилга айланган эди. Cobalt ўтган йили ҳам энг оммабоп автомобиль русуми бўлган.
Ўзбекистонда айни дамда Cobalt учун навбатлар 2022 йилнинг 31 декабригача чўзилган.
Қозоғистонда Cobalt нархи 5,9 млн тенге ёки 154 млн сўмдан бошлаб сотилади.
Изоҳ (0)