UzAutoMotors 2,5 соат ичида Cobalt, Damas ва Labo автомобиллари учун жами 25 мингтадан ортиқ шартномалар тузилганини маълум қилди.
Компания бугун, 25 декабрь куни соат 14:00 да учта оммабоп моделдаги автомобилларга контрактация очилишини хабар қилганди. Соат 16:30 ҳолатига кўра, қарийб 25 мингта шартномани онлайн равишда тузишга эришилган.
Хабар берилишича, шартнома тузиш жараёнида UzAutoSavdo онлайн-савдо тизими 6 минг 740 та киберҳужумга учраган.
“Умуман олганда, тизимда ушбу вақт оралиғида 2 миллиондан ортиқ фаол сеанслар ва сонияда 7 мингдан ортиқ янги сеанслар қайд этилди. Ушбу давр мобайнида компаниянинг Call-маркази томонидан 1 минг 500 та мурожаатлар қабул қилиниб, кўриб чиқилди”, — дейилади хабарда.
Аввалроқ компания 22 декабрь соат 12:00 да оммабоп автомобилларнинг 2024 йилги бутун ишлаб чиқариш режаси учун онлайн контрактация бошланиши маълум қилинганди. Кейин UzavtoSavdo тизимида соат 10:00 дан бошлаб қатор ташқи таъсирлар кузатилди ва бунинг натижасида тизимга мурожаатлар сони 1 сонияда 60 мингтагача етди.
Билдирилишича, UzavtoSavdo тизимига автомобиллар учун контрактация бошлангандан сўнг қилинган давомли киберҳужумлар, авторизация сўровларини қайта ишлашда муаммоларни юзага келтирган. Бу ўз навбатида, онлайн савдо тизимининг тўлиқ блокланишига олиб келган.
Изоҳ (0)