UzAuto Motors оммабоп автомобиллари нархини оширди

UzAuto Motors компанияси бир қатор оммабоп автомобилларнинг нархларини оширди. “Chevrolet.uz” сайтидаги янгиланган маълумотларга кўра, айрим моделлар нархи 9 миллион сўмгача қимматлашган.

Қимматлашган комплектацияларнинг янги нархлари:  

• Lacetti L-Style Plus АТ — 169 118 000 сўм (эски нархи – 160 868 000 сўм);
• Damas D2 DLX Style Plus — 96 932 000 сўм (эски нархи – 92 204 000 сўм);
• Labo LB2 Plus — 96 370 000 сўм (эски нархи – 91 669 000 сўм);
• Cobalt GS-Style Plus МТ — 119 542 000 сўм (эски нархи – 113 711 000 сўм);
• Cobalt GХ-Style Plus АТ — 141 181 000 сўм (134 294 000 сўм).

Эслатиб ўтамиз, 2022 йилнинг мартида Lacetti (Gentra) нархи — 12 фоизга, Damas, Spark, Cobalt, Nexia-3 — 10 фоизга кўтарилган эди.

UzAuto Motors 2023 йилнинг 4 август куни ишлаб чиқариш линияларида амалга оширилган модернизация ишлари, шунингдек, завод фаолияти самарадорлигининг ошиши ҳисобига 2023 йилда қўшимча 50 000 дона автомобиль ишлаб чиқариш имконияти яратилганини маълум қилган эди. Эртасига, 5 августда эса шартнома бериш тўхтатилгани маълум қилинганди.

Шунингдек, 18-сентябрь куни UzAuto Motors расмий сайтида кўрсатилган комплектация ва ранглардаги Chevrolet Cobalt, Lacetti, Damas ва Labo автомобиллари учун контрактация очилди ва кўп ўтмай Cobalt ва Lacetti учун шартнома бериш тўхтатилди. Бир неча кун олдин эса UzAuto Motors компанияси оммабоп автомобиллар учун шартномалар 2024 йилга қадар очилмаслиги айтилган хабарларга муносабат билдирганди.