Бир йил олдин Исроил разведка хизматлари Фаластиннинг ҲАМАС жангариларининг рация орқали суҳбатларини тинглашни тўхтатган, чунки улар буни “фойдасиз” деб ҳисоблаган. Бу ҳақда манбаларга таяниб, The New York Times хабар берди.
Хабарга кўра, Исроил бош хавфсизлик хизмати, агар бир йил аввал ҲАМАС жангариларининг суҳбатларини тинглашни тўхтатмаганида, ҲАМАСнинг Исроилга ҳужум қилишини башорат қилиши мумкин эди.
Исроил разведкасига бундай маълумотлар келиб тушмагани сабабли 7 октябрь, маҳаллий вақт билан эрталаб соат учларда махсус хизматлар жангариларнинг Ғазо секторидаги ғайриоддий фаоллигини аниқ тушунтира олмаган ва буни оддий машқ сифатида қабул қилган.
Кейин разведка идоралари ҲАМАС Исроилга кичик ҳужум уюштиришга ҳаракат қилиши мумкинлиги ҳақида тўхтамга келиб, ҳукуматдан Исроилнинг жанубий чегарасида терроризмга қарши кураш бўлинмасини жойлаштиришга буйруқ берган.
“Бироқ ҳужум бошланмагунча, ҳеч ким вазият шу қадар узоққа бориши мумкинлигига ишонмасди” , — деди Исроил ҳарбийлари NYT’га.
Шу тариқа, “Яқин Шарқдаги энг қудратли ҳарбий салоҳиятга эга” давлат нафақат ҳужум кўламини етарлича баҳоламади, балки “такаббурлик ва ҲАМАСни жиловлаш мумкин деган нотўғри тахмин туфайли разведка маълумотларини тўплашда муваффақиятсизликка учради”.
Газета Исроил, араб, европалик ва америкалик расмийлар билан мулоқот чоғида журналистлар томонидан олинган маълумотларга асосланиб, Исроилнинг хатосига яна бир қанча омиллар сабаб бўлган, деган хулосага келди.
NYT маълумотларига кўра, бир неча ой давомида разведка ходимлари Исроил бош вазири Биньямин Нетаньяхуни унинг сиёсий йўналиши мамлакатни заифлаштираётгани ва рақибларига ишонч бағишлаётгани ҳақида огоҳлантирган. Шу билан бирга, разведка Ғазо сектори жангариларининг Исроилга ҳужумини нотўғри прогноз қилган, чунки Ғарбий Соҳилда исроилликларга арабларнинг ҳужуми эҳтимоли катта деб қаралган.
Бундан ташқари, Исроил узоқ вақтдан бери яҳудий давлати учун энг катта таҳдид Эрон ва гўёки унга алоқадор бўлган гуруҳлардан келади, деб қараган. Сентябрь ойида баъзи расмийлар келгуси ойларда ёки ҳатто ҳафталарда улардан ҳужум кутишини айтган.
Шунингдек, Америка разведка идоралари сўнгги йилларда Исроилга ҲАМАС ва унинг режалари ҳақида маълумот тўплашда ёрдам беришни тўхтатган, чунки улар Исроил буни ўзи эплай олишига ишонган.
24 июль куни Исроилнинг юқори мартабали ҳарбий амалдорлари яҳудий давлати қонун чиқарувчиларини эҳтимолий хавф ҳақида огоҳлантирган, чунки уларга кўра, Ливандаги “Ҳизбуллоҳ” шиа гуруҳи етакчиларидан бири Ҳасан Насрулло жангариларни “катта урушга” тайёрланишга чақирган.
Бироқ Исроил ҳукумати доиралари бу огоҳлантиришларга эътибор бермаган. Нетаняху ҲАМАСни Фаластин миллий маъмуриятининг даъволарини мувозанатлаштира оладиган минтақавий куч сифатида қараб, глобал таҳдид сифатида кўрмаган. Америка расмийлари, ўз навбатида, ҳатто фаластинлик жангарилар ёрдамида минтақадаги бошқа гуруҳлар фаолияти ҳақида ҳам маълумот йиғишни режалаштирган.
Изоҳ (0)