Ҳаёт синовлари олдида таслим бўлмасликка ундайдиган энг яхши фильмлар

Ҳар биримиз ҳаётда турли қийинчилик ва тўсиқларга дуч келамиз, уларни енгиб ўтиш учун қалбан кучли бўлишимиз зарур. Қаҳрамонлар ўз характерининг бардошли эканини намойиш этадиган, ҳатто, энг қийин вазиятларда ҳам таслим бўлмасликка ўргатадиган фильмлар кетма-кетлиги билан танишинг.

“Буюк шоумен” (2017)

Мақсадга олиб борадиган йўл кўпинча тиканли, баъзан эса ақлдан оздирадиган даражада мураккаб кўринади. Мусиқий асар воқеалари 19-асрда бўлиб ўтади. Финиас Барнум рафиқаси Чарити ва икки қизи билан Нью-Йоркда кун кечиради. Қашшоқликларига қарамай, улар бир-бирларига чексиз муҳаббат билан яшайди. Бироқ тез орада уларнинг оиласини янги зарба кутади — Барнум ишлайдиган компания банкрот бўлди. Ишсиз қолган қаҳрамон имкониятдан фойдаланишга ва ўз даври учун инновацион ғояни амалга оширишга қарор қилади: Финиаснинг ўзи таъкидлаганидек, “ғайриоддий томоша”ни яратади ва уни намойиш этади. Кўпчилик бу спектаклнинг тақдири муваффақиятсизлик билан якун топишини башорат қилади. Аммо янги ва тажрибасиз шоумен барча тўсиқларга қарамай, ўз труппасининг ғалабасига астойдил ишонади.

“Шоушенкдан қочиш” (1994)

“Оскар” мукофотининг еттита номинациясига сазовор бўлган машҳур фильм икки киши — ўз хотини ва унинг жазманини ўлдирганликда айбланиб, умрбод қамоқ жазосига ҳукм қилинган банкир Энди Дюфрейн ҳақида ҳикоя қилади. Қаттиқ режим ва ғайриинсоний қамоқхонада бўлган чоғида, бош қаҳрамон руҳиятини чўктирмайди, шаънини сўзсиз ҳимоя қилади. Инсоний фазилатлари туфайли у Шоушенкда ўзига қулай муҳит яратади, дўстлар орттиради ва қайсидир маънода ижодий эркинликка эришади. Инсоний қиёфасини ва иродасини йўқотмаган ҳолда қамоқдан қочишга муваффақ бўлади.

“Танҳоликда” (2000)

Албатта, кўпчилик болалигида инглиз ёзувчиси Даниэль Дефонинг “Робинзон Крузо” романини ўқиган. Ушбу фильм замонавий воқеликлар контекстида чўл оролда омон қолиш ҳақида ҳикоя қилади. 1995 йилда бош қаҳрамон ролини Том Хенкс ўйнаган Чакнинг самолёти “Кук” архипелаги яқинида ҳалокатига учрайди. У сувда сузиб-сузиб қуруқликка чиқиб олишга муваффақ бўлади, аммо у бу ерда бутунлай ёлғиз қолганини тушуниб етади. Кундалик одатларини янгилашига тўғри келади, оғир жисмоний зўриқиш ва психологик синовларни бошдан кечиради. Фильм якунига қадар томошабинни таҳлика билан ушлаб турадиган ажойиб саргузашт драмасидир.

“Бахт излаб” (2006)

Гоҳида синовларга таслим бўлмаслик ва юксакликка эришиш учун энг кучли туртки — бу яқинларнинг бахтидир. Савдо вакили Крис Гарднер ҳали кичкина ўғли учун камбағалликдан қутулишга ҳаракат қилади. Қаҳрамон ўз оиласининг ҳаётини бутунлай ўзгартира оладиган даражада катта имкониятга эга бўлади, аммо бу жуда кўп куч ва машаққатли меҳнатни талаб қилади. Фильмнинг яна бир ютуғи шуки, унда асосий ролларни юлдузлар тандеми — Уилл ва Жейден Смит ўйнаган.

“Қуён Жожо” (2019)

Ўн ёшли болакайни лагердаги болалар масхара қилаётганини ҳис қилиш қандай? Агар бу бола фашистлар Германияси даврида яшаса ва лагер Юнгфолк ўқув лагеридан бошқа нарса бўлмаса-чи? Кичкина Ёханнеснинг оғир тақдири айнан шу жойдан бошланади. Бу ерда “Гитлер ёшлари” аъзолари жасоратини исботлаш учун Ёханнесга қуённи ўлдиришни буюрадилар. Аммо болакай буни қила олмайди ва шундан бошлаб ҳақоратли лақаб олади.

Қўрқинчли ҳақиқатга дуч келган ЖоЖо хаёлот оламига тобора кўпроқ шўнғий бошлайди. Бироқ сюжет ривожланиб борар экан, болаларнинг мавжуд тузум ҳақидаги содда тасаввурлари қандай барбод бўлишини, қаҳрамоннинг аста-секин атрофидаги вазиятни англаб етаётганини кузатиш мумкин. Ёханнес даҳшатли ҳақиқатни тан олиши, ўзи учун муҳим қарорлар қабул қилиши ва эрта улғайишига тўғри келди. Таъкидлаш жоизки, бу фильм трагикомедиядир, унда тасвирланган ғамгин воқеалар юмор йўсинида баён этилади.

“Maрслик” (2015)

Ушбу фильмдаги омон қолиш ҳақидаги яна бир ҳикоя. Асар илмий фантастика жанрида. Америкалик астронавт Марк Уотни тадқиқот экспедицияси чоғида адашиб, Maрсда қолиб кетади. Эндиликда қаҳрамон қийин вазиятдан чиқиш йўлини топиши, бегона ва чўл сайёранинг оғир шароитларига мослашишни ўрганиши шарт. Экипаж аъзоларининг Ердаги дўстлари уларнинг ҳалок бўлганига ишончи комил. “Maрслик” фильмини томоша қилиш сизга кучли мотивация беради, ўзингизга бўлган ишончни оширади.

“Ҳарбий ғаввос” (2000)

Реал воқеалар асосида суратга олинган фильм тарихдаги биринчи қора танли ғаввос Карл Брашер ҳақида ҳикоя қилади. Бутун тизим қарши чиққан инсоннинг нималарни бошидан кечиришига тўғри келишини тасаввур қила оласизми? Карл ирқий камситиш шароитида профессионаллик фақат қатъиятлилик, чидамлилик, матонат ва сабр-тоқат каби шахсий фазилатлар билан белгиланишини исботлайди. Йигит шунчаки мақсад сари бормайди, балки у учун курашади, кези келганда жиддий синовларга дучор бўлади. Орзулари Карлга жуда қимматга тушади, аммо у охир оқибат чинакам қаҳрамонга айланади.

“Форрест Гамп” (1994)

Бу фильмни такрор-такрор томоша қилиш мумкин. Кинокартинанинг сер қирралилиги ҳар сафар унда янги, жозибали, илҳомлантирувчи ниманидир топишга имкон беради. Сюжет марказида ақли заиф одамни кўриш мумкин. Соғлиқ ва ижтимоийлашув билан боғлиқ муаммоларга қарамай, қаҳрамон доимо нимагадир интилади. Бир жойда қотиб турмайди, шу боис унинг ҳаёти ёрқин воқеаларга бой. Қаҳрамон орзу қилади, севиб қолади ва ҳамма каби бахтли бўлишни истайди. Унинг бошига кўп синовлар тушади, аммо Форрест ҳар қандай вазиятга оптимизм билан қарайди, яхши томони у кўпинча омадли ҳамдир. Воқеа-ҳодисаларга содда, хушмуомалалик билан қараш унинг юксакликка эришишга, атрофидаги дунёни яхши томонга ўзгартиришга имкон беради. Агар фильмни ҳали кўрмаган бўлсангиз, бу хатони ҳозироқ тузатиш учун кинони томоша қилишга шошилинг!

“Истаклар рўйхати” (2007)

Ҳар доим ҳамма нарсани қилишга улгурадиганга ўхшайди, чунки олдинда бутун бир ҳаёт турибди. Аммо бош қаҳрамонлар Эдвард Коул ва Картер Чамберснинг бунга деярли вақти йўқ — иккаласи ҳам оғир касал ва қолган умри бир йилдан кўп эмас. Биринчиси — миллиардер, шифохоналар тармоғи эгаси, иккинчиси — оддий автомеханик. Улар бир палатада учрашадилар ва тез орада яқин дўстларга айланишади. Умидсиз вазиятда бўлишса ҳам таслим бўлмайдилар, аксинча, энг эзгу орзуларини амалга оширишга қарор қилишади. Дўстлар биргаликда тилаклар рўйхатини тузадилар, умрлари тугаши билан уларни рўйхатдан кесиб ташламоқчи бўладилар. Улар барча орзуларини амалга оширишга муваффақ бўладими, йўқми, ушбу руҳлантирувчи фильмни томоша қилсангиз, билиб оласиз.

Мавзуга доир:

• 29 йилдан сўнг: “Форрест Гамп” фильми актёрлари йиллар ўтиб қанчалик ўзгарган?
• Кинотавсия: 2023 йилги “Оскар”нинг номзодлар рўйхатига киритилган фильмлар