«Шоушенкдан қочиш» фильмида кўрсатилган Огайодаги эман дарахти кесилди

АҚШнинг Огайо штати Мэнфилд шаҳридаги «Шоушенкдан қочиш» фильми саҳналарининг бирида фойдаланилган эман дарахти кесилди. Дарахт тўнкаси 8 апрелда арралаб ташланди. Бу ҳақда Meduza хабар берди.

Дарахтни кесиш ҳақидаги қарор 2016 йил июль ойида кучли шамол уни синдирганидан сўнг қабул қилинган. Дарахт жойлашган ҳудуд эгаларидан бири Дэн Диснинг айтишича, дарахт бу жойни кўришга келган фильм мухлислари ва сайёҳлар учун хавф туғдира бошлади.

Дис кесилган дарахт тўнкасини сотишдан бош тортди. Аввалроқ дарахтнинг бир қисми ҳудуд яқинида жойлашган Мэнсфилд қамоқхонасига олиб борилган. Мазкур ахлоқ тузатиш муассасаси аслида мавжуд бўлмаган Шоушенк қамоқхонасини фильмда акс эттирган.

Фильмнинг бош қаҳрамони Энди Дюфрейн (Тим Роббинс) қамоқхонадан қочиб, дарахт остида дўсти Рэдга (Морган Фриман) мактуб қолдиради. Рэд озодликка чиққандан сўнг мактубни олади. «Шуни бил, Рэд, умид — яхши, балки дунёдаги энг яхши нарса — у ҳеч қачон ўлмайди», — деб ёзилади мактубда.

1994 йилда тақдим этилган фильм «Оскар» мукофотининг еттита йўналишига номзод сифатида қўйилган, бироқ бирорта ҳам совринга эга бўлмаган.

«Дарё»нинг Telegram’даги расмий канали — @toshqindaryo’га аъзо бўлинг!