Юқори рейтингларга эга бўлган кўплаб классик фильмлар ҳақли равишда олишлари керак бўлган мукофотга муносиб кўрилмаган. “Оскар”сиз бўлса-да, ҳақиқий кинематография афсоналарига айланган ажойиб фильмлар ҳақида маълумот берамиз.
“Таксичи”
Мартин Скорсезе режиссёрлик қилган драматик триллер 1976 йилда экранларга чиққан ва кўплаб томошабин ва кино танқидчиларнинг эътирофига сазовор бўлган, лекин “Оскар” олтин ҳайкалчасини олмаган. Вьетнам уруши ветерани Трэвис Бикле ҳақидаги воқеалар Нью-Йоркда юз беради. Асосий қаҳрамон, сурункали уйқусизликдан азият чекиб, тунги такси ҳайдовчиси бўлиб ишга жойлашади ва даҳшатли воқеаларнинг гувоҳига айланади.
“Яшил маскан”
“Оскар”ни олмаган яна бир машҳур фильм Фрэнк Дарабонтнинг “Яшил маскан” фильмидир. Мистик драма 1991 йилда Стивен Кинг романи асосида суратга олинган. Сюжет Жон Коффи исмли ғайриоддий характердаги одамга бағишланган: у қилмаган жинояти учун қамоққа олинади. Эзгулик ва ёвузлик ҳақидаги мазкур фильмда худбин одамларнинг ахлоқсиз хатти-ҳаракатлари қораланади.
“Шоушенкдан қочиш”
Фрэнк Дарабонт томонидан Стивен Кинг романи асосида суратга олинган “Шоушенкдан қочиш” фильми ҳам киноманлар орасида машҳур. Фильмдаги воқеалар “Шоушенк” — Янги Англиянинг энг қаттиқ режимдаги қамоқхонасида бўлиб ўтади. Худди шу жойга суд қарори билан хотини ва унинг ўйнашини ўлдиришда айбланиб, умрбод қамоқ жазосига ҳукм қилинган муваффақиятли банкир Энди Дюфрейн юборилади. Ўзига ёт бўлган муҳитда қолган Энди қамоқ қонунларини ўрганади ва янги ҳаёт шароитларига мослашишга ҳаракат қилади.
“Аватар”
Жеймс Кемероннинг культ фильми “Аватар” бутун дунёда чинакамига сенсация қилиши билан бир қаторда, кино тарихидаги энг йирик касса йиғувчи фильмга айланди. Кемерон ва унинг жамоаси илмий-фантастик фильмда янги, ранг-баранг оламни яратишга муваффақ бўлди. Бу томошабинларни ҳайратга солган бўлса-да, кинокартина олтин ҳайкалчага муносиб кўрилмади. “Аватар”ни кино саноатида технологик ютуқ деб тан олишга ёрдам берган ажойиб махсус эффектлар яратилганидан ташқари, режиссёр фильм орқали глобал миқёсдаги бир қатор муаммолар: экология, геноцид, колонизация ва туб аҳолининг маданиятини йўқ қилишни кўтариб чиқади.
“Уолл-Стрит бўриси”
Мартин Скорсезе томонидан суратга олинган, Леонардо Ди Каприо ва Марго Робби бош ролларни ижро этган биографик жиноий комедияда 1980 йилларнинг бизнес чўққисига чиқиш саргузаштлари ҳикоя қилинади.
Қизиқарли сюжет, ажойиб юмор ва, албатта, актёрлик маҳорати томошабинлар ҳамда кино танқидчиларни бефарқ қолдирмади. “Уолл-стрит бўриси” нафақат молиявий муваффақиятга эришади, балки қайта-қайта томоша қилиш мумкин бўлган афсонавий фильмга айланади. Комедия призмаси орқали Скорсезе жамият ва у билан боғлиқ бўлган барча мавзуларга тўхталиб ўтади. Инсоннинг аҳмоқлиги ва фақат моддий нарсаларга бўлган интилишнинг устидан кулиб, тез кўтарилишлар ҳар доим ҳам худди шундай тез тушишларга сабаб бўлишини кўрсатиб беради. 2014 йилда “Уолл-стрит бўриси” бешта “Оскар”га номзод бўлади, бироқ уларнинг бирортасида ҳам ғолиб чиқолмайди.
“Гранд Будапешт меҳмонхонаси”
Америкалик режиссёр Уэс Андерсон ўзининг ноёб услуби ва такрорланмас тақдимоти билан танилган. 2014 йилда унинг энг машҳур ишларидан бири бўлган “Гранд Будапешт меҳмонхонаси” фильми намойиш этилади. Афсонавий фильм меҳмонхона бошқарувчиси Густав ва унинг ёш дўсти — хизматчи Зеро Мустафанинг қизиқарли саргузаштлари ҳақида ҳикоя қилади.
Кино томошабин ва кино танқидчилар томонидан завқ билан кутиб олинади, кўплаб мукофотларга сазовор бўлади ва кино саноатининг асосий мукофоти учун тўққизта категорияда номзод этиб танланади. Тақдимот маросими натижаларига кўра, “Гранд Будапешт меҳмонхонаси” фильми костюмлар, грим, соч турмаклари, саундтрек ва саҳна рассоми иши учун мукофотларга сазовор бўлади, лекин кутилган номинацияларда — “Энг яхши фильм”, “Энг яхши режиссёр”, “Энг яхши сценарий”, “Энг яхши кинооператор иши” ва “Энг яхши монтаж” категорияларида мағлубиятга учрайди.
Изоҳ (0)