Ўзи нима гап?
Бир неча кун аввал, Тошкент марказидаги эски биноларнинг ертўласида 80 йил аввал йўқолган ва миллион АҚШ долларидан ортиқ қийматга эга хазина топилгани ҳақида хабар тарқалди.
Хориж ОАВлари, ноёб санъат асарлари, олтин ҳамда кумуш қуймалар, олтин, кумуш танга ва идишлар, қадимий суратлар, иконалар, қимматли металлдан ясалган буюмлар Тошкентдаги князь Романов саройида олиб борилган қидирув вақтида бино ертўласида топилгани ҳақида маълум қилишган.
Аввалари князь Романовнинг Тошкентдаги саройи Ташқи ишлар вазирлиги тасарруфида бўлиб, Қабуллар уйи сифатида фойдаланилган. Вазирлик матбуот хизмати «Дарё»га Романовнинг саройи бундан бир йил аввал Тошкент шаҳар ҳокимияти балансига ўтказилгани ҳақида маълум қилган.
Тошкент шаҳар ҳокимиятидаги манбаларимиз Романовнинг саройида ҳеч қандай қидирув ишлари бажарилмагани, бундан ташқари, қидирув ишларини бажаришга рухсат берилмагани ҳақида айтмоқда.
Бунинг устига, князь Романовнинг Тошкентдаги саройи 1891 йилда қурилган. «Kun.uz» нашри эса, хазина 1870 йилда қурилган харобанинг ертўласидан топилгани ҳақида хабар қилган.
Хазина қаерда ва қачон топилди?
Хабарларда қидирув ишлари ЎзФАнинг тарих ва археология соҳасидаги академик экспертлар гуруҳи билан давом эттирилаётгани маълум қилинган. Бироқ, Ўзбекистон Фанлар академияси «Дарё»га хазина билан боғлиқ бўлган масалалар билан шуғулланмаётганини маълум қилган.«Фанлар академияси бу масала билан шуғулланишмаяпти. Ҳозир маълумотни ўрганмоқдамиз, чунки бундай хабар бир йил аввал ҳам бўлганди», – деб маълум қилди Фанлар академияси матбуот хизмати.
Биз Музейлар ва кутубхоналарни ривожлантириш бошқармаси раҳбари Шаҳло Абдуллаева билан боғланиб, топилмаларнинг аниқ сони, номи ва қиймати ҳақида маълумот олишга ҳаракат қилдик.
«Топилмалар борасида ҳеч қандай аниқ маълумотлар йўқ. Хазина ҳақида на Фанлар академияси, на Миллий Университет раҳбариятининг хабари бор. Улар аслида борлиги ҳам шубҳали. Бир йил аввалги хабарлар, яна тарқаган бўлиши мумкин», – деди Шаҳло Абдуллаева.
Тошкент марказида топилган хазина ҳақида Миллий университетнинг кимё факультети 4-курс талабаси, Университет музейи илмий ходими Муҳаммадбобур Юсупов маълум қилган. Бироқ, биз Муҳаммадбобур билан боғланганимизда, у хазина борасида изоҳ беришдан бош тортиб, бу масалада яқин вақт ичида матбуот анжумани ташкил қилиниб, Университет расмийлари томонидан баёнот берилишини маълум қилган.
Топилмалар Миллий университет музейидалиги, баъзилари реставрация учун махсус лабораторияга топширилгани айтилмоқда.
Музейлар ва кутубхоналарни ривожлантириш бошқармаси раҳбари Шаҳло Абдуллаевага Миллий университет музейи давлат рўйхатидан ўтмаган, унинг ҳуқуқий мавқеи йўқлигини маълум қилган.
«Университет музейи давлат рўйхатидан ўтмаган. Унинг ҳуқуқий мавқеи йўқ. Музей деб айтиш ҳам нотўғри», – деган Шаҳло Абдуллаева.
Олий таълим вазирлиги матбуот хизмати билан боғлаганимизда, мазкур топилмалар бўйича Миллий университетнинг Тарих факультетида махсус коммисия тузилиб, текширув хулосаларига кўра, университет расмий баёнот билан чиқишини маълум қилган. Бироқ расмий баёнот қачон бўлиши ноаниқ.
Норасмий маълумотларга кўра, хазина аслида Миллий Университетнинг ертўласидан топилган. Бу ҳақда «Дарё»га университетдаги манбалари маълум қилган.
Университет ертўласига бир миллион АҚШ долларига баҳоланган хазина бундан 80 йил аввал номаълум сабабларга кўра беркитилиб, ҳеч қаерда қайдлар қилинмаганлиги сабаб, унутилган.
«Дарё» вазиятни кузатишда давом этмоқда.
Изоҳ (0)