Давлат хавфсизлик хизмати Наманган вилоят бошқармаси ва Бош прокуратура ҳузуридаги Иқтисодий жиноятларга қарши курашиш департаментининг вилоят бошқармаси ходимлари томонидан қуйма олтин маҳсулотларини қонунга хилоф равишда олиш ва ўтказиш ҳолати юзасидан тезкор тадбир ўтказилди. Бу ҳақда «Дарё»га департаментнинг вилоят бошқармаси маълум қилди.
Тўрақўрғон—Наманган йўналиши бўйлаб ҳаракатланиб келаётган Lacetti русумли автомашина тўхтатилиб, кўздан кечирилганда машина ўриндиғи тагидаги резина тўшама остида юмалоқ кўринишдаги сариқ рангли металл мавжудлиги, ушбу металл Наманган шаҳрида яшовчи фуқаро Аброр Нишоновга (исм-шарифлар шартли) тегишли эканлиги аниқланди. Текшириш давомида ушбу рангли металл аслида қуйма олтин эканлиги, у Самарқанд вилоятида яшовчи Охунжон исмли шахсдан 140 миллион сўмга сотиб олингани маълум бўлди.
Олиб борилган терговга қадар текширувда аниқланишича, Нишонов белгиланган тартибда тадбиркор сифатида давлат рўйхатидан ўтмасдан, қуйма олтинни ўзининг яшаш хонадонида ташкил этилган яширин цехда қайта ишлаб, заргарлик буюмларини ясаб сотиш мақсадида харид қилган.
Молия вазирлиги ҳузуридаги Давлат асиллик даражасини белгилаш палатаси хулосасида таҳлил учун тақдим этилган 1 дона умумий вазни 286,37 грамм бўлган сариқ рангли қўлбола қуймалар таркибида 99,5 фоиз олтин ва 0,2 фоиз кумуш борлиги, қуйма олтин 999 пробали экани кўрсатилган. Қуйма олтиннинг умумий қиймати 191 миллион 785 минг сўмни ташкил қилган.
Аброр Нишонов ва терговга қадар шахсини аниқлаш имкони бўлмаган Охунжон исмли шахс томонидан жуда кўп миқдордаги валюта қимматликлари қонунга хилоф равишда ўтказилиб, Жиноят кодексининг 177-моддаси 4-қисм «а» бандида назарда тутилган жиноят аломатлари содир этилгани учун уларга нисбатан жиноят иши қўзғатилиб, тергов ҳаракатлари давом этмоқда.
Изоҳ (0)