Инқирозда олтин сотиб олиш тавсия этилади. Ўзбекистонда буни қандай қилиш мумкин?

Аввалроқ Украина ва Россия ўртасидаги вазиятлар туфайли олтин нархи кўтарилгани ҳақида хабар берилган эди.

4 март ҳолатига кўра, бир унция нархи 1945 долларга баҳоланмоқда. Таққослаш учун, бир ой олдин у 1802 долларни ташкил қилган эди.

Ҳозир нафақат хориж, балки маҳаллий мутахассислар ҳам олтинга сармоя киритишни тавсия қилишмоқда. Ўзбекистонда буни бир неча йўллар орқали амалга ошириш мумкин:

• Тангалар. Сотувга 15, 20, 31 ва 31,1 граммлик эсдалик тангалар қўйилган. Нархлар кун сайин ўзгариб туради, жорий нарх билан Марказий банк сайти орқали танишиш мумкин. Ушбу мақола нашр қилинган вақтда тангалар нархи 10,4 млн сўмдан 21,6 млн сўмгача бўлган.
• Қуймалар. Улар тўрт кўринишда тақдим этилади — 5, 10, 20 ва 50 граммлик. Уларнинг нархи 3,5 млн сўмдан 34,7 млн сўмгача.
• Сувенир тўпламлар. Улар бешта олтин тангадан иборат. Икки кўринишда тақдим этилади — 20 ва 31,1 граммлик. Биринчисининг нархи — 69,5 млн сўм, иккинчиси — 108,1 млн сўм.

Жорий нархлар билан Марказий банк сайти ҳамда Telegram-канали орқали танишиш мумкин.

Уларнинг барчаси маҳаллий 999 стандартидаги олтиндан тайёрланган. Бутун республика бўйлаб банкларда сотилади.

Марказий банк раиси ўринбосари Бобир Абубакировнинг айтишича, 2021 йил сентябрь ойига қадар ўзбекистонликлар 5100 та қуйма олтин ва 2500 та танга сотиб олган. Аҳоли томонидан сотиб олинган олтиннинг умумий ҳажми 168,6 килограммни ташкил этади.

Олтинни сақлаш ва ундан фойдаланиш бўйича кўрсатмалар

Қуйма олтинлар, тангалар ва сувенир тўпламлар аҳоли унда ўз жамғармаларини сақлаши ёки инвестиция сифатида фойдаланиши учун ишлаб чиқарилади.

Марказий банк ушбу маҳсулотларнинг сирти зарарланиб қолмаслиги учун банкдан сотиб олинган вақтдаги қадоқларида сақлашни тавсия қилади.

Тангалар ва қуйма олтинларни фаол кимёвий бирикмаларни ўз ичига олган маиший кимёвий воситалар, косметик воситалар ва дори дармонларга яқин жойда сақлаш мумкин эмас. Айниқса, уларни хлор, ёд ва симоб яқинида сақлаш хавфли.

Тангаларни банкнот ёнида ҳам сақлаб бўлмайди, чунки ундаги бўёқлар ва қоғозида олтингугурт бирикмаси мавжуд, бу эса қимматбаҳо металлнинг сирти қорайишига сабаб бўлиши мумкин. Олтинни исталган вақтда банкка қайта сотиш мумкин.