Ангрен ва Олмалиқ яқинидаги шахтадан ноқонуний олтин қазиб олиб, уни сотиш билан шуғулланган шахс ушланди

ДХХ ходимлари Тошкент вилояти ҳудудида яна бир ноқонуний хатти-ҳаракатга чек қўйди, деб хабар берди ЎзА.

Маълум бўлишича, маҳаллий фуқаро М.Д. кўп вақтдан буён Ангрен ва Олмалиқ шаҳарлари яқинидаги ёпиқ шахталардан ноқонуний қазиб олинган олтинни андижонлик Н.У.га сотиб келган.

М.Д. навбатдаги олтин қуймаларни Н.У.га унинг қариндоши Т.М. орқали бериб юборади. Т.М. бошқарувидаги Lacetti русумли автомашина Андижон шаҳрига кириб келган вақтида тўхтатилиб, текширилганда 1 килограмм 476 грамм оғирликдаги олтин қуймалар, шунингдек, 14 минг АҚШ доллари ва 8,9 миллион сўм борлиги аниқланиб, процессуал тартибда расмийлаштириб олинди.

Терговолди суриштирув ишлари вақтида Т.М. олтин қуймаларни Н.У.нинг илтимосига кўра М.Д.дан 63 минг АҚШ долларига сотиб олганлигини билдирди.

Шундан сўнг, тезкор тадбир давом эттирилиб Н.У. ушланди ва заргарлик буюмлари ясаб, сотиш мақсадида муқаддам М.Д.дан олтин қуймаларни сотиб олганлигини тан олди.

Аниқланган барча ҳолатлар бўйича Ўзбекистон Республикаси Жиноят Кодексининг тегишли моддаларига мувофиқ, жиноят ишлари қўзғатилиб, тергов ҳаракатлари олиб борилмоқда.