Умумий массаси 85,1 килограммга тенг 2 мингдан ортиқ олтин ёмбилари Қирғизистон Миллий банки томонидан охирги 12 ой мобайнида аҳолига сотилди. Бу ҳақда, банк раиси Тўлқунбек Абдиғуловнинг сўзларига асосланиб, «РИА Новости» хабар бермоқда.
1, 2, 5, 10, 31,1 ва 100 грамм ҳажмдаги ёмбилар Қирғизистон тарихида илк бор 2015 йил майида сотувга чиқарилган эди. Республика қонунчилигига мувофиқ, харидорлар солиқ тўлашдан озод этилади. Миллий банк қуйма олтинни қайта сотиб олиш ҳуқуқи билан реализация қилади. Барча ёмбилар Қирғизистонда қазиб олинган олтиндан ясалган бўлиб, 999,9 пробага эгадир.
Абдиғуловнинг таъкидлашича, энг катта ҳажмли ёмби аҳоли орасида энг катта талабга эга бўлди — 100 граммли ёмбилардан бир йил давомида жами 735 дона сотилди. Иккинчи ўринда 5 граммли қуймалар турибди.
Шунингдек, ҳисобот даврида банк томонидан аҳолидан 40 килограмм олтин сотиб олингани айтилди.
Изоҳ (0)