Ўзбекистон Марказий банки ўлчовли олтин қуймалари ва қимматбаҳо металлардан ясалган эсдалик тангалари нархи 6 март куни рекорд даражада ошди. Бу ҳақда Марказий банк хабар берди.
Айни пайтда бир грамм қимматбаҳо металл нархи 885 280 сўм бўлиб, бир кун ичида 1,8 фоизга қимматлади. Оғирлиги 5 грамм бўлган олтин қуймалари нархи 4 миллион 426 минг сўмга баҳоланмоқда.
Банкларда олтин нархи кетма-кет учинчи кун рекорд даражада ошди. 4 март куни 5 граммли олтин қуймалари нархи 4 миллион 284 минг сўмни, 5 март куни 4 миллион 347 сўмни ташкил қилганди.
Йил бошига нисбатан олтин қуймалари нархлари 4,49 фоизгача қимматлаган бўлса, ўтган ойнинг мос даврига нисбатан ўсиш 6 фоизга етган.
Олтин қуймалар нима ва улардан қандай фойдаланиш мумкин?
Олтин қуймалар — оғирлиги 5, 10, 20 ва 50 грамм бўлган, 999,9 софликдаги олтиндан тайёрланган қуймалар. Махсус ҳимоя қадоқларида сотув учун тақдим этилади. Олтин қуймаларнинг қадоғи сертификат вазифасини бажаради ва ўз серия рақамига эга бўлади.
Олтин қуймалари ҳимояланган қадоқларда сотилади ва уларни бемалол уйда ёки банкда — индивидуал банк ячейкаларини ижарага олган ҳолда сақлаш мумкин. Уларнинг нархи бир ҳафта ичида бир неча марта ўзгариши мумкин. Олтин қуймаларини фақат банкларга сотиш мумкин.
Олтинга инвестиция киритиш ишончлими?
Олтин бошқа металлар сингари гиперинфляция ва молиявий бозорлардаги глобал тартибсизлик даврида ҳам нол даражада қадрсизланмайди. Шу маънода у ҳақиқатан ҳам қимматли қоғозлар ва валютага қараганда ишончлироқдир.
Бироқ, бошқа томондан, олтин нархи жуда ўзгарувчан. Қисқа муддатга сармоя киритишга қарор қилганлар учун бундай инвестиция фойдали бўлишига кафолат йўқ. Шунинг учун қимматбаҳо металларга сармоя киритиш одатда узоқ муддатли (10-20 йил) сармоя сифатида тавсия этилади. Узоқ муддатда уларнинг қийматининг ўсиши кўпинча инфляциядан ўзиб кетади.
Изоҳ (0)