Саудия Арабистони Шанхай ҳамкорлик ташкилотига қўшилишни истайди, деди Россиянинг Ар-Риёддаги элчиси Сергей Козлов “РИА Новости”га берган интервьюсида.
Унинг қўшимча қилишича, қироллик BRIKC (Бразилия, Россия, Ҳиндистон, Хитой ва Жанубий Африка иттифоқи) билан ҳамкорликдан ҳам манфаатдор.
“Ташқи сиёсат йўналишини диверсификация қилиш доирасида Саудия Арабистони ШҲТ ва BRIKC каби нуфузли халқаро бирлашмаларга қўшилишдан манфаатдор”, — деди элчи.
Унинг сўзларига кўра, саудияликлар бу борада, хусусан, Россия томони билан мулоқотлар чоғида тегишли фикрларни билдирмоқда.
“Агар шериклик масаласи ШҲТ мулоқотида фаол кўриб чиқилаётган бўлса, Саудия Арабистонининг BRIKC’га эҳтимолий аъзолиги ҳозирда консептуал жиҳатдан кўриб чиқилмоқда”, — дея қўшимча қилди Козлов.
Унинг қайд этишича, Ар-Риёднинг ушбу кўп томонлама тузилмаларнинг, биринчи навбатда, ШҲТнинг интеграциялашган қисмига айланиш истаги порлоқ истиқболга эга.
Шанхай ҳамкорлик ташкилоти — минтақавий хавфсизлик ва иқтисодий ҳамкорлик ташкилоти. Ташкилотга 2001 йилда Хитой, Ўзбекистон, Қозоғистон, Қирғизистон, Россия ва Тожикистон давлатлари раҳбарлари асос солган. Кейинчалик ташкилотга Ҳиндистон ва Покистон ҳам қўшилди. 2022 йил охирида Эрон парламенти ШҲТга аъзо бўлишни маъқуллади.
2022 йилда ШҲТнинг йиллик саммити 15—16 сентябрь кунлари Самарқандда бўлиб ўтди.
Изоҳ (0)