Қозоғистон Хитой билан умумий қиймати қарийб 1,25 триллион тенгелик (тахм. 2,5 млн доллар) уран оксиди етказиб бериш бўйича шартнома тузишини маълум қилди.
Мазкур масала 15 ноябрь куни бўлиб ўтадиган акциядорларнинг навбатдан ташқари умумий йиғилишида муҳокама қилинади.
“Казатомпром” Хитойнинг CNNC Overseas вa China National Uranium Corporation компанияларига (иккиси ҳам Хитой миллий ядровий корпорациясининг ядровий миллий компанияси таркибига киради) бозор шартларида уран концентратини етказиб беради. CNNC Хитойдаги АЭСларнинг асосий оператори бўлиб, атом энергетикаси ва технологиясини ривожлантириш, атом электр станцияларини қуриш ва ядро ёқилғисини ишлаб чиқариш бўйича ишланмалар билан шуғулланади.
Томонлар ўртасида аллақачон келишувга эришилган, аммо битимни тузиш масаласи йиғилишга қолдирилган, чунки Қозоғистон қонунчилигига кўра, у акциядорлар томонидан маъқулланиши керак. Бу сумма активларнинг умумий баланс қийматининг 50 фоиздан ортиғини ташкил этади.
Учрашув 15 ноябрь куни Остона шаҳрида бўлиб ўтиши кутилмоқда. Агар акциядорлар кворумга эриша олмаса, йиғилиш 18 ноябрга кўчирилади.
Жорий йилнинг 1 июль ҳолатига кўра, “Казатомпром” акцияларининг назорат пакети (75 фоиз) “Самрук-Казина” орқали Қозоғистон ҳукуматига тегишли бўлиб, 24,34 фоиз улушнинг номинал эгаси Citibank’дир. Компаниянинг биринчи ярим йилликдаги соф фойдаси 27,4 фоизга ошиб, 283,2 миллиард тенгега етди. Даромад 13,3 фоизга ошиб, 701,1 миллиард тенгега етди.
Ҳисобот даврида “Казатомпром” уран оксиди сотиш ҳажмини 18 фоизга, яъни 9,5 минг тоннадан 7,8 минг тоннагача камайтирган. Ишлаб чиқариш ҳажми йилига 6 фоизга ошиб, 10,8 минг тоннани ташкил этган. Гуруҳ ва “Казатомпром” операциялари бўйича ўртача сотиш нархи ўтган йилга нисбатан мос равишда 41 фоиз ва 34 фоизга ошган.
Изоҳ (0)