“Ўзбекистон темир йўллари” АЖ бош муҳандиси Ҳусниддин Ҳосилов ўз аризасига кўра вазифасидан олинган. Бу ҳақда “Ўзбекистон темир йўллари” матбуот хизмати “Дарё”га маълум қилди.
Ҳусниддин Ҳосилов бир неча йил “Ўзбекистон темир йўллари”да раҳбарлик лавозимларида, жумладан, бошқарув раиси сифатида ҳам ишлаган.
У 2023 йил июль ойида инвестицияларни жалб қилиш ва уларни ўзлаштиришда сусткашликка йўл қўйгани сабаб лавозимидан озод этилган. Кейинроқ ўша йилнинг декабрь ойида “Ўзбекистон темир йўллари”да бош муҳандис сифатида иш бошлаган.
Маълумот учун, Ҳусниддин Ҳосилов 1970 йил Тошкент вилоятида туғилган. Маълумоти – олий.
У 1992 йилда Тошкент темирйўл муҳандислари институтининг инженер-механик мутахассислиги бўйича тамомлаган. Меҳнат фаолиятини 1992 йилда “Ўзинтерсервис” қўшма корҳонасида тармоқ бошлиғи сифатида бошлаган.
1999–2002 йиллар “Ўзтемирйўлмаштаъмир” унитар корхонасида турли лавозимларда ишлаган. 2002 – 2008 йиллар стратегик ривожланиш бошқармаси бошлиғи, бир вақтнинг ўзида “Ўзбекистон темир йўллари” ДАТК бош менежер–бош муҳандисининг ўринбосари лавозимида ишлаб келган.
2011 – 2014 йилларда “Ўзбекистон темир йўллари” ДАТК бош менеджер – бош муҳандиси лавозимида ишлаган. 2014–2016 йилларда Вазирлар Маҳкамасининг департамент мудири лавозимида ишлаб келган.
2016–2019 йилларда “Ўзбекистон темир йўллари”нинг бош менеджер–бош муҳандиси лавозимида ишлаган. Ҳосиловга 2019 йил 5 февралдан ҳукумат қарори билан “Ўзбекистон темир йўллари” бошқарувининг раиси вазифасини бажариш юклатилган. 2019 йил июнидан расман бошқарув раиси лавозимини эгаллайди.
Ҳусниддин Ҳосилов 2020 йил 31 январдан эса яна бошқарув раиси в.б этиб тайинланганди.
Изоҳ (0)