“Қарши минтақавий темир йўл узели”нинг қарийб 5,5 млрд сўм қарздорлиги эвазига Trailblazer ва MAN хатланди, деб хабар бермоқда МИБ ахборот хизмати “Дарё”га.
Маълум қилинишича, Мажбурий ижро бюроси Қарши шаҳар бўлими иш юритувида қарздор “Қарши минтақавий темир йўл узели”дан 1 миллиард 729 миллион сўм, 19 февралдаги қарорига асосан 3 миллиард 688 миллион сўм, жами 5 миллиард 417 миллион сўм солиқ қарзини ундириш тўғрисидаги ижро ҳужжати мавжуд.
Бўлим давлат ижрочиси томонидан ушбу ҳужжатнинг ижросини таъминлаш мақсадида “Қарши минтақавий темир йўл узели”нинг раҳбари ва бош ҳисобчиси бир неча маротаба мавжуд солиқ қарздорлигини тўлаб бериши тўғрисида ёзма ва оғзаки равишда огоҳлантирилган бўлса-да, шу кунга қадар турли баҳоналар билан қарз тўланмасдан келган.
Шу сабабли давлат ижрочилари томонидан жорий йилнинг 26 февраль куни қарздор “Қарши минтақавий темир йўл узели”га тегишли бўлган Trailblazer ва MAN русумли автотранспорт воситалари хатланиб, жарима майдончасига жойлаштирилган. Шунингдек, автотранспорт воситаларини хатлаш жараёнида, қарздор корхона вакиллари давлат ижрочиларига нисбатан тўсқинлик қилишга уринган.
Ҳозирда ижро ҳужжатининг ижро этилишига тўсқинлик қилиш ёки давлат ижрочисига турли шаклда қонунга хилоф равишда таъсир ўтказиш ҳолати юзасидан ўрганишлар олиб борилмоқда.
Изоҳ (0)