“Толибон” Стандарт департаменти ҳамда ҳаракатнинг Нимрўз ва Ҳайратон портларидаги расмийлари Ўзбекистонга бир вагон сифатсиз нефть, Эронга тўрт танкер дизель қайтариб юборилганини маълум қилди. Бу ҳақда “Дарё”нинг Афғонистондаги мухбири хабар берди.
“Толибон” стандарт департаменти Twitter (Х)га жойлаган постида Нимрўз портида Эрондан келтирилган тўртта сифатсиз дизель танкерини ортга қайтаргани ҳақида ёзган.
Ҳайратон савдо портидаги “Толибон” мутасаддилари эса Ўзбекистонга бир вагон сифатсиз нефть қайтариб юборилганини айтишган.
Ҳайратондаги “Толибон” стандарт департаменти раҳбари Ғулом Яҳё Лақонийнинг айтишича, ушбу сифатсиз нефть Ўзбекистоннинг GTL заводидан сотиб олинган ва Афғонистонга “Анор Дара” компанияси томонидан олиб келинган.
Департамент мамлакатга сифатсиз нефть кириб келишининг олдини олиш учун портлар мониторинги кучайтирилганини таъкидламоқда.
Аввалроқ “Толибон” расмийси ўтган тўрт ойда Ўзбекистондан келган 80 вагон сифатсиз нефть-газ ортга қайтарилганини даъво қилганди.
“Ўзбекнефтгаз” раиси Баҳодир Сиддиқов шу каби хабарларга жавобан Афғонистонга нефть эмас, янги турдаги дизель юборилгани, маҳсулот сифати пастлиги учун эмас, балки унинг стандарти Афғонистонда йўқлиги учун қайтарилганини тушунтирган.
Изоҳ (0)