Словакия бош вазири Роберт Фицо “Правда” газетасига берган интервьюсида Украинага дунёдаги барча қурол-яроғ ва пул берилган тақдирда ҳам у Россияни ҳарбий жиҳатдан мағлуб эта олмаслигини айтди. Бош вазир можарони ҳарбий йўл билан ҳал этиш мумкинлигига ишонмаслигини таъкидлади ва яна бир бор Словакия Украинага қурол етказиб бермаслигини айтди.
“Биз Украинага ҳарбий эмас, балки гуманитар ёрдам кўрсатиш орқали ёрдам беришга тайёрмиз. Украинада вазиятни ҳарбий йўл билан ўзгартириш учун етарли кучлар йўқ ва у ҳеч қандай қарши ҳужумга қодир эмас. 2024 йилга келиб Россия бу можарони ҳал қилиш учун ўз шартларини қўя бошлашини кўрасиз”, — деди Фицо.
Роберт Фицо октябрь ойи бошида ҳукумат тепасига келди. У Венгрия Бош вазири Виктор Орбан билан Европа Иттифоқи фондидан Украинага 50 миллиард евро миқдоридаги янги ёрдам пакети ажратилишига қарши чиқди. Оқибатда Украинага ёрдам ажратиш бўйича келишув амалга ошмади.
Ноябрь ойи бошида Словакия ҳукумати Киевга аввалги вазирлар маҳкамаси томонидан маъқулланган 40,3 миллион евро миқдоридаги ҳарбий ёрдам ўтказилишига ҳам тўсқинлик қилган эди. Словакия ҳукумати ҳам Украинанинг Европа Иттифоқи ва НАТОга киришига қарши.
Изоҳ (0)