Россия президенти Владимир Путин агар Польша ўз қўшинларини Украинага киритса, бу Украина ҳудудларини йўқота бошлашини англатишини айтди. Бу ҳақда “РИА Новости” хабар берди.
“Польшанинг интилишлари бор. Шунинг учун агар Польша бўлинмалари Украинага киритилса, улар қандай номланишидан — ички қўшинлар ёки миллий гвардия — қатъи назар, қўшин киритилган Украина ҳудудлари тугашининг бошланиши бўлади”, — деди Путин.
Россия раҳбари Иккинчи Жаҳон урушидан олдин Львов Польшанинг бир қисми бўлмаганини таъкидлади.
“Тарихчилар айтганидек, Ялта конференциясида Сталин Львов Совет Иттифоқининг бир қисми сифатида Ғарбий Украина таркибида бўлиши кераклигини айтган. Черчилл бунга эътироз билдирган. У Львов ҳеч қачон Россия империясининг бир қисми бўлмаганини билдирган. Бунга жавобан Сталин: ‘Аммо Варшава бир қисми бўлган’, деб жавоб қайтарган”, — деди Путин.
Путиннинг Польшага оид сўнгги баёноти:
Аввалроқ Россия президенти Польша кейинчалик Украина ҳудудини босиб олишни режалаштираётганини айтганди. У Варшава бунга Польша, Литва ва Украина ҳарбий иттифоқини тузиш орқали эришишини билдирган.
“Польша етакчиларига келсак, улар ‘НАТО соябони’ остида қандайдир коалиция тузиш ва Украинадаги можарога бевосита аралашиш, кейин ўзлари учун каттароқ бўлак ‘кесиб олиш’, ўзининг тарихий ҳудудлари — бугунги Ғарбий Украинани қайтариб олиш учун пайт пойламоқда. Маълумки, улар Беларусь ерларини ҳам орзу қилади”, — деган Путин.
Шунингдек, Путин Польшанинг ғарбий ҳудудлари Сталиннинг “туҳфаси” эканини таъкидлаганди.
Изоҳ (0)