Саудияда Украинадаги урушни тугатиш бўйича музокараларда нималарга келишилди?

Саудия Арабистонида 5 август куни Украина бўйича тинчлик музокаралари бошланди. Учрашувнинг биринчи куни Украина учун тинчлик формуласининг асоси нима бўлиши кераклиги ҳақидаги келишув билан якунланди. Бу ҳақда Европа Иттифоқидаги манбаларига таяниб, Corriere della Sera хабар берди.

Музокара иштирокчилари Украинанинг ҳудудий яхлитлиги ва суверенитетини ҳурмат қилиш, БМТ низоми тинчлик шартномасининг асоси бўлишига рози бўлган. Музокаралар давомида Украина президенти Владимир Зеленский тақдим этган тинчлик формуласининг 10 банди асосида ишчи гуруҳларни тузишга қарор қилинган.

“Бундан ташқари, давлат раҳбарларининг учрашуви вақти муҳокама қилинмоқда. У 2023 йил охиригача бўлиб ўтиши мумкин”, — дейилади хабарда.

Жиддадаги тинчлик музокаралари ҳақида нималар маълум?

5 август куни Саудия Арабистонида Украинада тинчлик ўрнатиш бўйича музокаралар бошланди. Унда 40 га яқин давлатдан юқори мартабали амалдорлар иштирок этмоқда.

Зеленский Жиддадаги йиғилишда турли қитъалардан ва глобал турлича сиёсий ёндошувга эга 42 давлат вакиллари иштирок этишини айтди:

“Аммо барчани халқаро ҳуқуқ устуворлиги бирлаштиради. Шунинг учун Украина тинчлик формуласини таклиф қилди. Чунки қоидаларга асосланган ва Россия агрессияси томонидан бузилган халқаро тартибни тиклаш керак”, — деган у.

Россиянинг позицияси

Россия томони Жиддага таклиф қилинмаган, Кремль 31 июль куни “Россия бу учрашувни кузатишини” маълум қилди. Ўшанда Путин матбуот котиби Дмитрий Песков “музокара иштирокчилари ўз олдига қандай мақсад қўйгани ва нима ҳақида гаплашмоқчи эканини тўлиқ тушуниш керак”лигини билдирди.

ТИВ матбуот котиби Мария Захарова 2 август куни Россия Жиддадаги учрашувни “Россияга қарши коалиция тузиш”га уриниш сифатида баҳолашини айтди.

Россия Хавфсизлик кенгаши раиси ўринбосари Дмитрий Медведев 6 август куни “урушни тугатиш истагини қоралаш қийин”, деб таъкидлади.

У тарихий контекст ва ҳозирги воқеликни инобатга олиш кераклигини айтди. Медведев конфликтнинг ҳар икки томонининг иштироки каби шартлар бажарилсагина, тинчлик таклифлари муваффақиятли бўлиши мумкинлигини билдирди.