Украинага қарши жанг қилаётган ҳарбийлар маоши маълум бўлди

Россия мудофаа вазири Сергей Шойгу мамлакат армияси таркибида Украинага қарши жанг қилаётганлар қанча маош олишини айтди. Бу ҳақда “РИА Новости” хабар берди.

Маълум қилинишича, шартнома бўйича ҳарбий хизматчилар, кўнгиллилар ва сафарбар этилганлар ойига 210 минг рубль ва ундан кўп маош олади. Украина қуроллари ва ҳарбий техникасини йўқ қилиш ёки тортиб олиш учун тўлов амалга оширилади.

“Барча тўловлар ўз вақтида тўланади. Тўловлар масаласи алоҳида назоратга олинган, агар берилмагани аниқланса, зудлик билан чоралар кўрилади”, — деди Россия мудофаа вазири.

Шунингдек, 2023 йилда Россия қўшинларига 490 мингга яқин шартнома бўйича ҳарбий хизматчилар ва кўнгиллилар жалб қилингани, 4 мингдан ортиқ талаба “ўз ташаббуси билан” фронтга жўнагани ва чет эллик кўнгиллилар сони етти баравар кўпайганини айтди.

Россия мудофаа вазири урушда Украина 383 минг ҳарбийсини йўқотганини айтди, бироқ Россиянинг йўқотишлари сонини очиқламади.