Qozog‘iston ham IBA’ni tark etib, yangi tuzilgan boks tashkilotiga a’zo bo‘lish uchun ariza topshirdi

Qozog‘iston boks federatsiyasi IBA’ni tark etib, yangi tuzilgan World Boxing tashkilotiga aʼzo bo‘lish niyatida.

Mamlakat boks federatsiyasi rasman World Boxing’ga aʼzo bo‘lish uchun ariza berdi.

Hozirda boksni Olimpiadada saqlab qolish XOQ darajasida muhokama qilinmoqda. Biz boksni Olimpiya o‘yinlarida saqlab qolish uchun barcha mamlakatlar bilan hamkorlik qilishga tayyormiz.

World Boxing’ning Olimpiya komissiyasi raisi, Qozog‘iston Olimpiya qo‘mitasi prezidenti Gennadiy Golovkin bilan uchrashuvda vatanimiz boksini rivoji borasida muhokamalar qildik, — dedi mamlakat boks federatsiyasi rahbari Shaxmurat Mutalip.

Qozog‘iston Milliy Olimpiya qo‘mitasi prezidenti Gennadiy Golovkin World Boxing tashkilotining Olimpiya komissiyasi rahbariga aylandi.

Sobiq bokschi bu lavozimda boshqa sport tashkilotlari bilan hamkorligida World Boxing’ning shaffofligi masalalariga javob beradi. Shuningdek, u boksning Olimpiya o‘yinlari dasturida qolishi bo‘yicha Xalqaro Olimpiya qo‘mitasi bilan hamkorlik qiladi.

Maʼlumot uchun, World Boxing tashkilotida niderlandiyalik Boris van der Vorst prezident hisoblanadi. Tashkilotga hozirga qadar 44 ta mamlakat aʼzo bo‘lgan.

Avvalroq Jazoir boks federatsiyasi World Boxing Butunjahon boks tashkilotiga qo‘shilgandi.

Avgust oyida birdaniga 5 davlat — Xitoy Taypeyi, Pokiston, Butan, Fiji va Ekvador ham World Boxing a’zosiga aylangandi.

O‘zbekiston MOQ Bosh kotibi Oybek Kasimov World Boxing bilan muzokaralar olib borilayotganini ta’kidlagan edi. 

World Boxing 2023-yil aprel oyida IBA’ga muqobil sifatida va boksni Olimpiya harakatida saqlab qolish maqsadida tashkil etilgan. Tashkilot XOQ tomonidan tan olinishiga erishish niyatida. Avvalroq XOQ sport direktori Kit Makkonel Jahon boks vakillari bilan bir necha uchrashuvlar bo‘lib o‘tganini, ularda ushbu tashkilotni rasman tan olishning turli jihatlari muhokama qilinganini ma’lum qilgandi.