World Boxing prezidenti Boris van der Vorst kecha, 7-oktyabr kuni O‘zbekiston Milliy Olimpiya qo‘mitasiga tashrif buyurdi.
Dastlab Van der Vorstga MOQning faoliyati, o‘zbek sportining shonli tarixi haqida ma’lumot berildi. Shundan so‘ng Van der Vorst va sport vaziri Adham Ikramov, MOQ bosh kotibi Oybek Kasimov, qo‘mita raisi o‘rinbosari, mamlakat boks federatsiyasi raisining birinchi o‘rinbosari Saken Polatov hamda MOQ raisi o‘rinbosari Sherzod Tashmatov ishtirokida uchrashuv o‘tkazildi.
Yig‘ilishda World Boxing prezidenti tashkilot faoliyati, uning maqsadlari haqida ma’lumot berdi. Unga ko‘ra, bugungi kunga kelib 49 davlat ushbu xalqaro federatsiyaga a’zo bo‘lib, boks rivoji bo‘yicha kelgusida qator istiqbolli loyihalar rejalashtirilgan.
Suhbat davomida boks bo‘yicha O‘zbekiston erkaklar terma jamoasining Parij—2024 yozgi Olimpiya o‘yinlarida 7 ta vazndan 5 tasida oltin medalni qo‘lga kiritgani, bugungi kunda O‘zbekiston boks olamida jahonda yetakchilardan biri ekani ham tilga olindi. Qolaversa, rasmiylar boksning Los-Anjeles—2028 yozgi Olimpiya o‘yinlari dasturida saqlanib qolishi tarafdori ekanini bildirishdi.
Ma’lumot uchun, avvalroq Qozog‘iston ham IBA’ni tark etib, yangi tuzilgan boks tashkilotiga a’zo bo‘lish uchun ariza topshirgani ma’lum qilingandi.
O‘zbekiston MOQ bosh kotibi Oybek Kasimov World Boxing bilan muzokaralar olib borilayotganini ta’kidlagan edi.
Izoh (0)