Ўзбекистон ташқи ишлар вазири Бахтиёр Саидов 7 октябрь куни Москва шаҳрида МДҲ Ташқи ишлар вазирлари кенгашининг йиғилишида иштирок этди.
Вазирнинг билдиришича, унда 8 октябрь куни бўлиб ўтадиган МДҲ саммитига якуний тайёргарлик жараёнлари муҳокама қилинди.
“Ҳамдўстликнинг барча мамлакатлари бир-бирини бирлаштирувчи мустаҳкам пойдевор бўлиб хизмат қиладиган узоқ йиллик тарихий алоқаларга эга. Шундай бўлса-да, барча соҳаларда, айниқса, иқтисодий ҳамкорликни оширишда ўзаро манфаатли ҳамкорликни янада кенгайтириш учун кенг имкониятларни кўриб турибмиз”, деб ёзди Бахтиёр Саидов.
Унинг қайд этишича, транспорт боғлиқлигини мустаҳкамлаш, савдо учун энг қулай муҳитни яратиш, дунё бўйлаб кучайиб бораётган можароларни ҳал қилиш, тинчлик ва фаровонлик учун кучларни бирлаштириш ҳамда минтақавий ва глобал миқёсдаги долзарб масалалар эътибор марказида бўлди.
Шавкат Мирзиёев 7 октябрь куни Москва шаҳрига етиб борди. 8 октябрь куни МДҲ саммитининг асосий тадбирлари бўлиб ўтади.
МДҲ Ижроия қўмитаси маълумотларига кўра, 8 октябрь куни бўлиб ўтадиган саммитда Ҳамдўстлик доирасидаги ҳамкорлик, 1941−1945 йиллардаги ғалабанинг 80 йиллиги муносабати билан МДҲ мамлакатлари халқларига ва жаҳон жамоатчилигига мурожаат, МДҲ Парламентлараро ассамблеясининг интеграцион ҳамкорликни мустаҳкамлаш бўйича фаолияти ва бошқа масалалар муҳокама қилинади.
Давлат раҳбарлари яқин уч йилга мўлжалланган ҳамдўстликнинг маданий пойтахтларини эълон қилиш тўғрисидаги қарорларни имзолайди, ҳуқуқий соҳадаги ҳамкорлик ҳамда хавфсизликни таъминлаш соҳасига оид қатор ҳужжатларга тузатишлар киритади.
МДҲ давлат раҳбарлари кенгашининг 2023 йилги саммити 13 октябрь куни Қирғизистон пойтахтида бўлиб ўтганди. Унда Ўзбекистон президенти ҳамдўстлик доирасидаги ўзаро манфаатли ҳамкорликни янада кенгайтириш бўйича қатор ташаббусларни илгари сурганди. Саммитда Шавкат Мирзиёев МДҲнинг Фахрий нишони билан мукофотланганди.
Кун тартибидан ҳамдўстлик доирасидаги кўп томонлама ҳамкорликни янада ривожлантиришнинг долзарб масалалари ўрин олган.
Изоҳ (0)