Bugun, 13-oktyabr kuni O‘zbekiston prezidenti Shavkat Mirziyoyev Bishkekda o‘tayotgan MDH sammitida nufuzli Faxriy nishon bilan mukofotlandi.
Faxriy nishonni Shavkat Mirziyoyevga Qirg‘iziston prezidenti Sadir Japarov topshirdi.
Mustaqil davlatlar hamdo‘stligining Faxriy nishoni —MDH Davlat rahbarlari kengashining 2002-yil 7-oktyabrdagi qarori bilan ta’sis etilgan bo‘lib, mintaqaviy hamkorlikni rivojlantirishga alohida hissa qo‘shgan shaxslarga beriladi.
Shu paytga qadar ushbu mukofot bilan Rossiya prezidenti Vladimir Putin, Ozarbayjon sobiq prezidenti Haydar Aliyev, Ukraina sobiq prezidenti Leonid Kuchma, Tojikiston prezidenti Imomali Rahmon va boshqalar taqdirlangan.
Sadir Japarov O‘zbekiston prezidentining do‘stlik va yaxshi qo‘shnichilik munosabatlarini mustahkamlash, xavfsizlik va barqarorlikni taʼminlash, Markaziy Osiyo davlatlari va butun MDH mamlakatlari iqtisodiyotini barqaror rivojlantirishga qaratilgan saʼy-harakatlarini yuksak e’tirof etdi.
“Ko‘p jihatdan Shavkat Miromonovichning shaxsiy sa’y-harakatlari tufayli MDHda yangi ishonch muhiti yaratildi, o‘zaro savdo va sarmoya hajmining oshishiga xizmat qiluvchi qulay muhit shakllanmoqda.
O‘zbekiston Respublikasi prezidenti do‘stlik va yaxshi qo‘shnichilik munosabatlarini mustahkamlash, xavfsizlik va barqarorlikni ta’minlash, Markaziy Osiyo va butun MDH davlatlarining barqaror ijtimoiy-iqtisodiy rivojlanishiga beqiyos hissa qo‘shdi”, — dedi Sadir Japarov.
Izoh (0)