Тошкент ва Фарғона вилоятларида ер майдонларини ноқонуний сотмоқчи бўлганлар ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, ҳолатлардан бири Бош прокуратура ҳузуридаги департаментнинг Паркент туман бўлими томонидан ИИБ ходимлари билан ҳамкорликда ўтказилган тезкор тадбирда аниқланган. Фуқаро I.Ш. “Самаробод” МФЙ ҳудудидаги ўзбошимчалик билан ўраб олинган 9 сотих ер майдони фуқаро Э.Б.га 270 миллион сўмга сотишга келишган. Ҳужжатларни танишлар орқали расмийлаштириб беришни ваъда қилиб, олдиндан 20 000 долларни олган вақтида ашёвий далиллар билан ушланган.
Шу каби департаментнинг Фарғона вилоят бошқармаси томонидан ИИБ ходимлари билан ҳамкорликда ўтказилган тезкор тадбирда, Ўзбекистон тумани Қишлоқ хўжалиги бўлими ҳудуд ер тузувчиси М.М. фуқаро Г.Р.га 3 гектар ер майдонини аукцион орқали арзон нархларда ютиб бериш эвазига 4000 долларни олган вақтида ашёвий далиллар билан ушланган.
Уларнинг иккиси ҳам муқаддам судланган бўлган. Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)