Президент Шавкат Мирзиёев республикага намуна қилиб кўрсатган Қашқадарёнинг Ғузор туманидаги «Дўстлик-1,2,3» насос станцияси соатига 8,35 киловатт электр энергиясини иқтисод қилиб, бир йилда қарийб 75 миллион куб метр сув чиқариш имкониятига эга. Бу ҳақда Ғузор тумани ҳокими Бекзод Суюнов маълум қилди, дея хабар берди «Дарё» мухбири.
Таъкидланишича, Зоир Мирзаев ташаббуси билан Қашқадарёда фаолият юритувчи журналист ва блогерлар учун пресс-тур ташкил этилиб, ҳудуддаги мавжуд экин майдонларини суғориш иншоотлари ҳамда насос станциялари ҳақида маълумот берилган.
«‘Дўстлик-1,2,3’ насос станцияси 21 миллион 233 минг долларга қуриб битказилган бўлиб, олтита насос агрегати ўрнатилган. Уларнинг ҳар бири секундига 6 куб метр сув чиқариш қувватига эга. Янги насос станцияси ишга туширилиши натижасида 21 минг гектар майдонда сув таъминоти яхшиланди. Бу насос станция орқали биз яна 3 минг гектаргача янги ер майдонларини очиш имкониятига эгамиз. Насос станция соатига 8,35 киловатт электр энергиясини иқтисод қилиб, бир йилда қарийб 75 миллион куб метр сув чиқаришга эришилади», — деди ҳоким Бекзод Суюнов.
Ҳокимнинг таъкидлашича, «Дўстлик-1,2,3» насос станцияси қурилиши учун сарфланган 21 миллион 233 минг долларни 20 йилда қайтариш кўзда тутилган. Бироқ ҳокимлик инвесторларни жалб қилиб, суғориладиган ер майдонларида экспортбоп маҳсулотларни етиштириш ва уларни экспорт қилиш орқали кредит маблағини 10 йилда қайтаришни режалаштирган.
Ҳокимга кўра, вилоятда яна 16 та насос станцияси қайта таъмирланади.
«Вилоятда яна 16 та насос станцияси таъмирланиши кўзда тутилган бўлиб, шунинг 5 таси Ғузор туманида жойлашган. Мана шу 5 та насос станцияси 12,5 миллион еврога қайта таъмирланиши режа қилинган. Бу биз учун яна янги ишни ўрни ва янада янги имкониятлар эшигини очади», — дейди Ғузор ҳокими.
Қайд этилишича, насос стациясидаги барча технология ва қурилмалар масофадан туриб бошқарилади ва назорат қилинади. Ишчиларнинг меҳнат қилиши, дам олиши учун ҳамма шароитлар яратилган.
«Дўстлик-1,2,3» насос станциясининг фойдаланишга топширилиши натижасида илгари сув танқислигидан зарар кўриб келган Қарши туманидаги 2 та ҳамда Ғузор туманидаги 12 та ҳудудга сувни муаммосиз етказиб бериш имконияти яратилган.
Изоҳ (0)