Тошкент, Андижон ва Фарғона вилоятларида ер майдонларининг ноқонуний сотилишига чек қўйилди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Қибрай туман бўлими томонидан ИИВ ходимлари билан ҳамкорликда тезкор тадбир ўтказилган. Тадбирда А.У. ва Б.В. исмли шахслар ўзаро тил бириктириб, “Т.Т.” МЧЖга иссиқхона қуриш учун узоқ муддатга ажратилган ер майдонининг 1,8 гектарини фуқаро Э.М.га фирибгарлик йўли билан 300 минг долларига соцҳга келишгани аниқланган. Улар гўёки юқори лавозимда ишловчи таниши орқали ҳужжатларни расмийлаштириб беришни ваъда қилиб, олдиндан 10 минг долларини олган вақтларида ашёвий далиллар билан ушланган.
Шу каби, департамент ҳамда ДХХнинг Андижон вилояти бошқармалари томонидан ўтказилган тезкор тадбирда фуқаро М.А. ва бошқалар Олтинкўл туманидаги “Р.К.” фермер хўжалигига қарашли 10 сотих ер майдонини фуқаро Ф.Т.га турар-жой қуриш учун 55 минг долларига сотишга келишиб, шундан 15 минг долларни олган вақтида ашёвий далиллар билан ушланган
Департаментнинг Тошлоқ туман бўлими томонидан ўтказилган тезкор тадбирда эса Р.Р. ва А.К. исмли шахслар фуқаро А.Қ.га Қувасой шаҳри ҳудудидан 8 минг доллари эвазига 9,6 сотих ер майдонини турар-жой сифатида расмийлаштириб олиб беришларини айтиб, шундан 3 минг долларни олган вақтларда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ер савдолари
Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.
Изоҳ (0)