Президент қарори билан Янги Тошкент шаҳри барпо этиладиган ер майдонлари рўйхати белгиланди.
Унга кўра, янги шаҳар Тошкент шаҳри Тошкент вилоятининг Юқори Чирчиқ ва Ўрта Чирчиқ туманларидаги 19 720,9 гектар ерда барпо этилади:
- Юқори Чирчиқ туманидан Ўзбекистон, Дўстлик, Суранкент, Туркистон, Гулистон, Ийк ота, (Қибрай) Нурмуҳаммедов мавзелари;
- Ўрта Чирчиқ туманидан Дўстлик, Охунбобев, Ким Пен Хва мавзелари ва Шоличилик институти ҳудудидаги қишлоқ хўжалигига ихтисослашган ерлар ажратилади.
Шундан қарийб 13 минг гектари қишлоқ хўжалигига мўлжалланган (11 минг гектардан ортиғи суғориладиган) ерлар ҳисобланади. Ушбу ер участкалари аҳоли пунктлари ерлари тоифасига ўтказилади.
Қорақалпоғистон Вазирлар Кенгаши ва вилоятлар ҳокимликлари қишлоқ хўжалигига мўлжалланган ер участкалари қисқариб кетишининг олдини олиш мақсадида 2028 йил 1 январга қадар ҳар йил якунида тенг улушларда ушбу қарор билан тоифаси ўзгартирилаётган суғориладиган ер участкалари майдонига тенг янги ерлар ўзлаштирилишини ва суғориладиган ерлар тоифасига ўтказилишини таъминлайди.
Қишлоқ хўжалигига мўлжалланган ерларнинг ушбу қарорга мувофиқ тоифаси ўзгартирилгани учун қишлоқ хўжалиги ва ўрмон хўжалиги ишлаб чиқариши нобудгарчиликлари ўрнини қоплаш бўйича компенсация тўловлари ундирилмайди.
Янги Тошкент шаҳрини барпо этишга мўлжалланган ер участкаларидан уларда белгиланган тартибда давлат мулки сифатида рўйхатдан ўтказилганидан ҳамда жисмоний ва юридик шахсларга етказилган зарар тўлиқ қопланганидан сўнг бошқа мақсадларда фойдаланилади.
Изоҳ (0)