Жиззахда “Ҳудудгаз” бўлим бошлиғи ва МЧЖ раҳбари 64 гектар ерни сотишга уринганида ушланди. Бу ҳақда ИИВ Тезкор-қидирув департаменти хабар берди.
Қайд этилишича, “Ҳудудгаз Жиззах” филиали қурилиш ва таъмирлаш бўлими бошлиғи, “Жиззах нефтгаз строй” МЧЖ раҳбари билан ўзаро жиноий тил бириктириб, 26 ёшли фуқарога Зафаробод тумани ҳудудида “Жиззах нефтгаз строй” МЧЖ номига балиқчилик фаолиятини ривожлантириш учун 10 йил муддатга ижара асосида ажратилган 40 гектар ҳамда ўзининг ерига туташ бўлган яна 24 гектар ер майдонини жами 800 миллион сўмга сотишга келишган. Келгусида давлат ўрмон хўжалиги балансидаги 130 гектар ер майдонини ўзининг юқори лавозимда ишловчи ваколатли танишлари орқали олиб бериши эвазига 10 минг доллар беришни сўраган.
13 март куни Жиззах вилояти ИИБ ходимлари билан ҳамкорликда ўтказилган тезкор тадбир давомида икки нафар шахс Жиззах шаҳрида жойлашган меҳмонхонада келишилган пуллардан 300 миллион сўмини олдиндан бўнак сифатида олган вақтида ашёвий далил билан ушланган.
Ҳолат юзасидан Иқтисодий жиноятларга қарши курашиш департаментининг Дўстлик тумани бўлими томонидан жиноят кодексининг 168-моддаси (фирибгарлик) 4-қисми “а” банди билан жиноят иши қўзғатилиб тергов ҳаракатлари борилмоқда.
- Аввалроқ Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди.
- Апрель бошларида эса Навоийда 80 гектар ерни 1 миллиард сўмга сотишга уринган шахслар ушлангани,
- Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди.
Изоҳ (0)