Яқин Шарқдаги бугунги фожиали вазият Фаластин можаросининг ҳарбий ечими йўқлигини яна бир бор исботлади, дея Тожикистон президенти Имомали Раҳмон Нью Йоркда БМТ Бош ассамблеясининг 79-сессиясида фикр билдирди.
Раҳмон Фаластин инқирози Тожикистонни чуқур ташвишга солишда давом этаётганини таъкидлаган.
“Тожикистон бу масалани якуний ва реал ҳал этиш фақат Бирлашган Миллатлар Ташкилотининг 1967 йилги чегаралар асосида мустақил Фаластин давлатини яратиш ҳақидаги қарорларини амалга ошириш орқали мумкин бўлади, деб ҳисоблайди”, дейди Тожикистон раҳбари.
У низолашаётган томонлар ўт очишни тўхтатиш ва тинчлик музокаралари йўлида қадам ташлашига, халқаро ҳамжамият Фаластинда мустаҳкам барқарорликни тиклаш учун самарали чоралар кўришига умид билдирган.
Раҳмон, шунингдек, Душанбе қўшни Афғонистонда мустаҳкам тинчлик ва барқарорлик ўрнатилиши, ижтимоий-иқтисодий тараққиёт тарафдори эканини маълум қилган.
“Бу мақсадда Тожикистон Афғонистондаги тинч ҳаётнинг турли жабҳаларини тиклаш ва ривожлантиришга ҳисса қўшишга доимо тайёр”, дея таъкидлаган сиёсатчи.
Афғонистонда гуманитар инқирознинг олдини олиш учун Раҳмон яна бир бор халқаро ҳамжамиятни “кўп азоб чеккан афғон халқига, жумладан, табиий офатлардан жабр кўрган ҳудудларга” ёрдам беришга ҳаракат қилишга чақирди.
Изоҳ (0)