Қўшма Штатлар БМТ Хавфсизлик кенгашининг Бош Ассамблеяга Фаластин давлатини жаҳон ташкилотига тўлиқ аъзо сифатида қабул қилишни тавсия этувчи резолюция лойиҳасига вето қўйди. Бу ҳақда Deutsche Welle хабар берди.
18 апрель куни бўлиб ўтган йиғилишда Хавфсизлик кенгашининг 12 аъзоси, жумладан, Россия ва Хитой Жазоир таклиф қилган ҳужжатни қабул қилиш учун овоз берган. Буюк Британия ва Швейцария бетараф қолган, фақат АҚШ қарши чиққан.
Бу овоз бериш Фаластин давлатчилигига қаршиликни акс эттирмайди, балки бу фақат томонлар ўртасидаги тўғридан тўғри музокаралар орқали амалга ошишини тан олишдир, — деди АҚШнинг БМТдаги доимий вакили ўринбосари Роберт Вуд.
Фаластин миллий маъмурияти раҳбари Маҳмуд Аббос АҚШнинг БМТ Хавфсизлик кенгашидаги ветосини “адолатсиз, ахлоқсиз ва асоссиз” дея қоралаган. Унинг сўзларига кўра, бу Фаластиннинг жаҳон ташкилотига тўлиқ аъзо бўлишини қатъий қўллаб-қувватловчи халқаро ҳамжамият иродасига зиддир.
Исроил ташқи ишлар вазири Исраэл Кац Қўшма Штатларнинг вето ҳуқуқидан фойдаланишини олқишлаган.
Ушбу шармандали таклиф рад этилди. Терроризм мукофотланмайди, — деди Кац.
Жазоирнинг БМТдаги доимий вакили Амар Бенжама овоз беришдан олдин фаластинликларни жаҳон ташкилотига қабул қилиш икки давлат ечимига путур етказишдан кўра мустаҳкамланишини таъкидлаган.
Резолюция кўриб чиқилиши учун уни БМТ Хавфсизлик кенгашининг 15 аъзосидан камида тўққизтаси қўллаб-қувватлаши ҳамда беш доимий аъзодан ҳеч бири — АҚШ, Хитой, Россия, Франция ва Буюк Британия вето ҳуқуқидан фойдаланмаслиги лозим. Агар ушбу шарт бажарилса, ариза БМТ Бош Ассамблеясининг овозига қўйилади.
Дастлаб, Фаластиннинг БМТга қабул қилиш ҳақидаги аризаси 2011 йил ноябрь ойида Хавфсизлик кенгашининг позицияси туфайли рад этилган эди. Кейинги йили БМТ АҚШнинг қаршиликларига қарамай, фаластинликларга кузатувчи мақомини берган. БМТга аъзо 193 давлатдан 139 таси Фаластинни мустақил давлат сифатида тан олган.
Изоҳ (0)