Япония БМТнинг фаластинлик қочқинларга ёрдам кўрсатиш агентлигини (UNRWA) молиялаштиришни қайтадан бошлашни режалаштирмоқда, дея Al Jazeera хабар берди.
Япония ташқи ишлар вазири Ёко Камикава 28 март куни Токиода UNRWA раҳбари Филипп Лаззарини билан учрашиб, агентликнинг шаффофлиги ва бошқарувини яхшилаш йўлларини, жумладан, маблағларнинг кузатилиши ва ходимларнинг бетарафлигини таъминлашни муҳокама қилган.
Япония ва UNRWA Япония ҳиссасини янгилаш бўйича зарур саъй-ҳаракатларни якуний мувофиқлаштиришга ёрдам беришларини тасдиқлади, — дейилади Япония ТИВ баёнотида.
Токионинг бу ҳаракати сўнгги ҳафталарда Европа комиссияси, Канада, Австралия, Швеция ва Финляндия томонидан молиялаштиришдаги шунга ўхшаш паузаларнинг бекор қилинишидан кейин амалга оширилган.
Лаззарини 26 март куни Швейцариянинг Keystone-АTS ахборот агентлигига UNRWA агентлиги ўз фаолиятини март ойида тўхтатишга мажбур бўлиши мумкинлиги ҳақида олдиндан огоҳлантирганидан кейин май ойининг охиригача маблағ ажратганини айтган.
Январь ойида Исроил ҳукумати UNRWA’нинг 12 нафар ходими ҲАМАСнинг Исроил жанубидаги ҳужумларида иштирок этганини билдиргач, ўндан ортиқ давлат мазкур ташкилотни молиялаштиришни тўхтатган эди.
Кейинчалик Исроил расмийлари UNRWA’нинг 450 дан ортиқ ходими Ғазодаги террор гуруҳларида ҳарбий хизматчилар эканини даъво қилган.
Даъволарни текшираётган БМТ Исроил айбловни тасдиқловчи далиллар келтирмаганини айтган.
1949 йилда ташкил этилган UNRWA 5,9 миллионга яқин фаластинлик қочқинларни озиқ-овқат, тиббий ёрдам ва таълим билан таъминлайди. Агентлик 2022 йилда 1,2 миллиард доллар миқдорида молиялаштирилиши айтилган эди, энг катта ҳисса Қўшма Штатлар, Германия ва Европа Иттифоқи томонидан берилади.
Изоҳ (0)