Бирлашган Миллатлар Ташкилоти бош котиби Антониу Гутерриш Фаластиннинг ҲАМАС ҳаракати жангчиларининг 7 октябрь куни Исроилга ҳужумини сўзсиз қоралашини айтди, бироқ бу бесабаб содир бўлмаганини унутмасликка чақирди.
“Мен 7 октябрь куни Исроилда ҲАМАС томонидан содир этилган даҳшатли ва мисли кўрилмаган террор ҳаракатларини сўзсиз қораладим. Тинч аҳолининг ўлдирилиши, яраланиши ва ўғирланиши, шунингдек, тинч аҳоли нишонларига ракета учирилишини ҳеч нарса билан оқлаб бўлмайди. Бироқ ҲАМАС ҳужумлари ўз-ўзидан содир бўлмаганини ҳам тушуниш жуда муҳим. Фаластин халқи 56 йил давомида босқин остида яшади”, — деди у Яқин Шарқдаги вазият бўйича жаҳон ташкилоти Хавфсизлик кенгашидаги очиқ мунозарада сўзлаган нутқида.
Гутерришнинг айтишича, Ғазо секторида халқаро ҳуқуқнинг очиқдан очиқ бузилаётгани уни жиддий ташвишга солмоқда.
“Мен Ғазода кузатилаётган халқаро гуманитар ҳуқуқнинг очиқ-ойдин бузилишидан жиддий хавотирдаман. Шуни аниқ айтишга ижозат беринг: қуролли можаронинг ҳеч бир томони халқаро гуманитар ҳуқуқдан устун эмас”, — деди у.
Изоҳ (0)