АҚШнинг Нью-Йорк штатидаги Колумбия университетида Фаластинни қўллаб намойиш уюштирган 100 дан ортиқ талаба ҳибсга олинди. Бу ҳақда Middle East Press нашри хабар берди.
Манбада айтилишича, воқеа 18 апрель куни рўй берган. Намойишга чиққан талабалар оммавий ҳибсга олинган. Бу эса олийгоҳ кампуси ҳудудида янги кескинликни келтириб чиқарган.
Университет талабалари АҚШни Исроилга ҳарбий ёрдамни тўхтатишга чақирган норозилик акцияси ташкил этган. Фаластинни БМТга қабул қилишга чақириқлар янграган. Талабаларни ҳибсга олишга университет президенти Минуч Шафик шахсан бошчилик қилгани айтилган.
Талабалар дастлаб 17 апрель куни университет кампусида ўнлаб кўчма чодирлар қуришган. Улар ўзларини Колумбия университети апартеид тизимига қарши курашувчилар деб аташган. Чодирлар ўрнатилган кампус ҳовлисини эса “Ғазо бирдамлик лагери” деб номлашган.
Университет ректори сўзларига кўра, намойишчиларга университет тартиб-қоидаларини бузаётганликлари ва буни тўхтатишлари зарурлиги бир неча бор айтилган. Намойишда қатнашаётган барча университет талабалари ўқишдан четлаштирилгани ҳақида маълум қилинган. Аммо бу қадам ҳам талабаларни тўхтата олмаган.
Columbia Daily Spectator манбаси хабарига кўра, жами 108 нафар талаба ҳибсга олинган. Улардан икки нафари қўшимча равишда намойишни ташкиллаштирганликда ва ҳукумат сиёсатига тўсқинлик қилганликда айбланмоқда.
“Улар Софоклни, Карл Марксни, Мартин Лютер Кингни ўқиб-ўрганадилар, аммо геноцидга қарши туриш вақти келганида, ўқиганларига амал қилмайдилар — ҳеч нарса қилмайдилар”, — дейилган норозилик кўтарган талабалар баёнотларида.
БМТ университет ва округ маъмуриятининг талабаларга нисбатан тутган сиёсатини қоралаб чиққан. Талабалар билан боғлиқ сиёсатдан эҳтиёткор бўлишга чақирган.
Изоҳ (0)