Исроил ҳукумати БМТ Бош ассамблеясининг фаластинликларни БМТга тўлақонли аъзо сифатида қабул қилишни тавсия қилувчи резолюциясини бир овоздан рад этди. Бу ҳақда Deutsche Welle хабар берди.
Биз 7 октябрдаги даҳшатли қирғинни рағбатлантирмаймиз, ҳудудидан бизга ҳужум қилиш мумкин бўлган террорчи давлатнинг пайдо бўлишига йўл қўймаймиз, — деди Исроил бош вазири Биньямин Нетаньяху 15 май куни Исроил вазирлар маҳкамаси йиғилишидан кейин.
10 октябрь куни БМТ Бош ассамблеяси БМТ ҳузурида кузатувчи давлат мақомига эга бўлган Фаластин маъмуриятига Бош ассамблея йиғилишларида тўлиқ овоз бериш ҳуқуқини бермаган ҳолда сезиларли даражада кенгроқ ҳуқуқлар бериш тўғрисидаги резолюцияни қабул қилган эди. 193 давлат аъзо бўлган Бош ассамблея, шунингдек, БМТ Хавфсизлик кенгашини Фаластинни жаҳон ташкилотига тўлақонли аъзолик қилиш масаласини жиддий кўриб чиқишга чақирган.
Резолюцияни ёқлаб 143 давлат овоз берган, тўққиз давлат қарши чиққан, яна 25 давлат бетараф қолган. Нетаньяхунинг таъкидлашича, Бош ассамблея резолюцияси Фаластин ҳудудлари мақомини ҳеч қандай тарзда ўзгартирмайди, келажакдаги музокаралар ва тинчлик келишуви учун асос бўлмайди.
Нетаньяху, шунингдек, ҲАМАС устидан ғалаба қозонилгунга қадар Ғазода бўлажак маъмурият ҳақидаги гапларни “маъносиз” деб атаган.
ҲАМАСнинг мағлубияти Ғазода бизга таҳдид соладиган ҳеч ким йўқлигини таъминлаш учун зарур қадамдир, — дейди у.
Исроил бош вазирининг сўзларига кўра, тахминан юз кун аввал у Исроил хавфсизлик кучларига Ғазодаги ҲАМАСга алоқадор бўлмаган маҳаллий вакилларга гуманитар ёрдам тарқатишда иштирок этишга рухсат берган. Нетаньяху ҲАМАС уларга таҳдид қилгани сабабли мазкур уриниш муваффақиятсиз бўлганини қўшимча қилган.
Изоҳ (0)