Франциялик актриса ва ҳайвонлар ҳимоячиси Брижит Бардо Қозоғистон президенти Қосим-Жўмарт Тўқаевга йўлланган очиқ хатни эълон қилди. Актриса ўз мактубида мамлакатдаги дайди ҳайвонларга бўлган шафқатсиз муносабатдан хавотирга тушган.
Бардонинг хатида айтилишича, у ўз мактубини Қозоғистондаги уйсиз ҳайвонлар тақдири борасидаги ўз хавотирларини ва қўрқувини ифодалаш учун ёзган. Актриса хатида унга итлар ва мушукларни шафқатсизларча овлаш ва йўқ қилиш бўйича маълумотлар келишда давом этмоқда.
Брижит Бардонинг қайд этишича, Атирау ва Уральск шаҳарларида дайди ҳайвонлар газ билан фалаж қилинган ва кейин ёқиб юборилган. Актрисанинг фикрича, бу каби ишлар 21-асрга мос эмас. Унинг ёзишича, бу каби ишларни Франция ва кўплаб дунё мамлакатларида амалга оширган кишилар руҳий касал деб тан олинади ҳамда даволанишга жўнатилади ёки узоқ муддатли қамоқ жазосига ҳукм қилинади.
Бардо ўз мактубида Қозоғистон президентини ҳайвонларга нисбатан инсоний ёндашувга ўтишга чақирган.
Брижит Бардо Қозоғистонда ҳайвонларга бўлган муносабатни ўзгартиришда унинг фонди ёрдам кўрсатиши мумкинлигини таъкидлаб ўтган.
Аввалроқ Тошкент шаҳар ИИББ итнинг устига бензин сепиб, ёқиб юборган фуқароларнинг шахсини аниқлаш билан шуғулланаётгани ҳақида хабар берилган эди. Самарқандда эса Spark ва Nexia итни босиб ўтишга уринган, ППХ ходими эса унга тош улоқтирганди. Ит 15 кишига ташлангани хабар қилинган эди. Бухорода эса 10 мингга яқин дайди ва қаровсиз ит, мушуклар йўқ қилингани маълум бўлган эди.
Шунингдек, Самарқандда «Шарқ тароналари» фестивали арафасида итлар заҳарлаб ўлдирилган эди.
Изоҳ (0)