79 ёшли актёр, “Хавфли жозиба”, “Асосий инстинкт”, “Етар, бас” фильмлари билан машҳур бўлган Майкл Дуглас ва “Зорро ниқоби” фильмида рол ўйнаган 54 ёшли Кетрин Зета-Жонс хонадонини сотувга қўйди. Уй Нью Ёрк яқинидаги денгиз бўйида жойлашган бўлиб, 12 миллион долларга баҳоланган. Ирвингтонда жойлашган ҳашаматли уй 5 гектар ерни эгаллайди.
Зета-Жонснинг айтишича, эндиликда унинг турмуш ўртоғи фарзандларидан алоҳида, икки хил уйда яшашни режалаштирмоқда: бири Бермуд оролларида, иккинчиси Европада жойлашган.
Wall Street Journal маълумотларига кўра, кўчмас мулкнинг сотилиши машҳур жуфтликка 7,5 миллион доллар даромад келтириши мумкин, чунки Зета-Жонс 2019 йилда уйни атиги 4,5 миллион долларга харид қилган.
Хонадон Нью Ёрк шаҳридан 32 километр узоқликда кўркам ва замонавий қишлоқда жойлашган бўлиб, Гудзон дарёси бўйлаб давом этган ажойиб ландшафтга эга. Кетриннинг айтишича, болалари вояга етгач, турмуш ўртоғи билан алоҳида уйда вақт ўтказишни истайди.
“Мен Ирвингтондаги уйни харид қилганимда оиламиз бу хонадонда кўплаб бахтли кунларини ўтказишига қаттиқ ишонар эдим ва шундай бўлди ҳам. Энди ўғлимиз ва қизимиз катта ҳаётга қадам қўяр экан, менимча, уйни сотиш вақти келди”, — дейди актриса.
Сўнгги пайтларда юлдузларнинг актёрлик фаолияти Европада давом этаётгани учун улар АҚШга камроқ ташриф буюришга қарор қилган:
“Майкл ва мен Бермуд ороллари ва Европада кўпроқ вақт ўтказишни режалаштирмоқдамиз”, — деди Зета-Жонс.
Сотувга қўйилган саройдек катта уй ўзига хос тарихга эга. Анна Мари Леоннинг “Ирвингтон” китобига кўра, бу ерлар бир вақтлар шакар савдоси билан шуғулланган Маттиссен оиласига тегишли бўлган. 1902 йилда Конрад Меттиссен машҳур Tiffany & Cо. заргарлик компанияси асосчиси, марҳум Чарльз Льюис Тиффанига тегишли бўлган 20 гектар ерни сотиб олган. Ҳозирда ушбу ерлар Дуглас ва Зета-Жонс мулкидир.
Хонадон кенг кўламли таъмирлаш ишлари билан модернизация қилган бўлиб, хонадоннинг тарихий дизайнини сақлаб қолишга ҳаракат қилинган. Уй интерери ўзида классик ва замонавий дизайнни мужассам этган ҳамда кўчиб ўтиш ва яшаш учун тайёр ҳолатда.
Изоҳ (0)