Ижтимоий тармоқлар ва бир нечта янгиликлар сайтларида Қирғизистон ҳукумати Иссиқкўл бўйидаги тўртта пансионатни хусусий инвесторларга сотишни режалаштираётгани ҳақида хабарлар тарқалди, деб ёзади Spot.
«Шуниси эътиборлики, 2016 йилнинг апрель ойида ушбу пансионатлар Қирғизистон Республикаси томонидан Ўзбекистон компанияларидан қонунга хилоф равишда тортиб олинган эди», — дейилади «Миллий банк», «Асака банк» ва «Ўзсаноатқурилишбанк» ҳамда Тошкент механика заводи АЖнинг қўшма пресс-релизида.
Пресс-релизда айтилишича, «Ўзмиллийбанк» «Роҳат-НБУ» пансионати, «Асакабанк» «Дилором» пансионати, «Ўзсаноатқурилишбанк» «Бўстон» пансионати, «Тошкент механика заводи» АЖ «Олтин қумлар» пансионатига эгалик қилган ҳамда бошқарган.
Ушбу компаниялар, айниқса, 2016 йилдан бошлаб ҳозирга кунгача давом этаётган арбитраж иши шароитида пансионатлар сотилишига қатъиян қарши чиқди.
Арбитраж иши ҳукумат томонидан пансионатлар мулкдорларидан ноқонуний олиб қўйилгани учун товон пули тўлашни кўзда тутади.
2019 йил 1 май куни арбитраж трибунали Ўзбекистон мулкдор ташкилотлари фойдасига қарор чиқарди ва низога нисбатан ўз юрисдиксиясини тасдиқлади. Ҳозирда суд иши даъвони моҳияти бўйича кўриб чиқишга тайёргарлик кўриш жараёнида.
Хабарда қайд этилишича, 1965 йилда қабул қилинган Вашингтон конвенциясининг 46 ва 47-моддаларига мувофиқ томонлар бирининг талабига биноан агар томонларнинг низоларни ва ваколатларни ҳал қилиш тартиби тўғрисидаги келишувига мувофиқ бўлса, арбитраж низо мавзусига бевосита боғлиқ бўлган қўшимча ёки қарама-қарши талаблар юзасидан қарор қабул қилади.
«Шу муносабат билан Ўзбекистон компаниялари Қирғизистон ҳукумати томонидан пансионатларни сотишга қатъий эътироз билдириб, ўз позицияларига амал қилишни давом эттиради ва бу масала бўйича барча ҳуқуқий ҳимоя воситаларидан фойдаланиш ҳуқуқини ўзида сақлаб қолади», дейилади хабарда.
Изоҳ (0)