“Ҳар бир қирғизистонлик Иссиқкўлнинг ифлосланиш кўламини билса, даҳшатга тушади” — депутат

Бишкекда “Тунук кел – Тунук келечек” экологик форуми бўлиб ўтди. Унда Иссиқкўлдаги пансионатлар учун тозалаш иншоотларини ўрнатиш масалалари муҳокама қилинди. Бу ҳақда Economist хабар берди.

Депутат Камила Талиева ўз нутқида ҳар бир қирғизистонлик Иссиқкўл атроф-муҳит ифлосланиши кўламини билса, даҳшатга тушишини таъкидлади.

“Иссиқкўл вилояти ҳудудида геопарк ташкил қилиш керак. Хитойда ҳам шундай тажриба бор. Керакли меъёрий ҳужжатларни ишлаб чиқиш учун фуқаролик ташкилотлари ва экологларнинг ёрдами керак. қирғиз халқи азалдан табиат билан ҳамнафас яшаб келган, аммо атроф-муҳитни асраш учун ҳар бир фуқаро масъулиятни ўз зиммасига олиши керак”, — деди депутат.

Камила Талиева Жогорку Кенешда кўлни муҳофаза қилиш бўйича янги қонун лойиҳаси ишлаб чиқилаётганини қўшимча қилди.