Иссиқкўлдаги сув 10 йил ичида соҳилдан қарийб бир метрга чекинган, деб маълум қилди Қирғизистон Табиий ресурслар, экология ва техник назорат вазирлигининг Сув ва ер ресурслари бошқармаси бошлиғи Таалай Далбаев.
“2011 йилдан 2021 йилгача қирғоқдан сув 95 сантиметр ортга чекинди. Бунга иссиқ иқлим туфайли кўлга қуйиладиган кичик дарёлар сонининг камайгани сабаб бўлди. Бутун Қирғизистонда қуриб қолган кичик дарёларни учратиш мумкин. Бу йил ёзда деярли ёмғир ёғмади. Иссиқкўл вилоятида 156 та дарё бор, аммо кўлга атиги 30 таси қуйилади”, — деди қирғизистонлик расмий.
У муаммони бартараф этиш усулларини ҳам маълум қилди. Қайд этилишича, бунинг учун сувни тежовчи технологияларни жорий этиш, сувни кам сарфлайдиган экинларни экиш, томчилатиб суғоришга ўтиш зарур.
Эслатиб ўтамиз, Қирғизистон Иссиқкўл бўйида янги шаҳар қуришни бошлаган. Осмон номли “келажак шаҳри”ни етти-ўн йил ичида қуриш режалаштирилган; унда 500-700 минг киши яшаши мумкин бўлади.
Изоҳ (0)