Қирғизистон президенти Садир Жапаров “Кабар” агентлигига берган интервьюсида Иссиқкўлдаги тўртта пансионатнинг ўзбекистонлик инвесторларга ижарага берилаётгани сабабини айтди.
Ижтимоий тармоқларнинг қирғиз сегментида пансионатларнинг ўзбекистонлик инвесторларга 49 йилга ижарага берилиши узоқ муддат экани, бу 5-10 йилни ташкил этиши кераклиги айтилган.
“Тўртта пансионат бўйича қуйидагиларни айтаман. 2016 йилда Темир Сариев бош вазир сифатида уларни тортиб олди, тўғрисини айтсам, бу кўпроқ популизмга ўхшарди. Ўшанда архив ҳужжатларини ўрганиш ва бу объектларнинг келажаги ҳақида фикр юритиш керак эди. Агар шундай ҳаракат билан халқаро судда ютқазиб қўймаслигимизга кафолатлар бўлса, мақсадга мувофиқ бўларди.
Ўша йили Ўзбекистон томони Вашингтондаги халқаро судга мурожаат қилиб, 65 миллион доллар товон тўлашни талаб қилган.
2017 йилда Сапар Исоқов Ўзбекистон томонига мактуб йўллаб, муаммони тинч йўл билан ҳал қилиш ва тўртта пансионатни Ўзбекистон томонига қайтариш масаласини ишлаб чиқишни таклиф қилган. Шунингдек, у даъвони қайтариб олишни сўраган. Аммо Ўзбекистон томони даъволаридан воз кечмади.
2023 йилнинг май ойида суд Қирғизистон томони 40 миллион доллардан ортиқ пул тўлаши керак, деган қарорга келган. Биз Ўзбекистон томони билан музокаралар олиб бордик ва объектларни 49 йилга ижарага беришга, уларни тўрт-беш юлдузли меҳмонхоналар даражасига кўтаришлари бўйича келишиб олдик: уларга белгиланган суммани тўлашга имконимиз йўқ”, — таъкидлади президент.
Жапаровнинг таъкидлашича, ушбу пансионатлар бугунги ҳолати вайронага айланганки, уларни омборхона деб аташ мумкин. Бу уларни ривожлантиришни талаб қилади.
“Яқин 15-20 йил ичида уларни модернизация қилишга сармоя кирита олмаймиз, чунки бизда жуда кўп бошқа муҳим камчиликлар мавжуд. Уларни тузатмагунимизча, пансионатлар ҳақида гап бўлиши мумкин эмас.
Агар ушбу тўртта пансионатни сотса, уларни ҳеч ким 4 миллион долларга олмайди, 40 миллион доллар ҳақида гапирмаса ҳам бўлади. Майли, 5-10 йилга ижарага берса бўларди, дейиш нодонлик, чунки тўрт-беш юлдузли меҳмонхоналар қуриш 5-10 йилни олади.
Шунинг учун ҳеч бир давлат ўз инвестициялари ўрнини тўлдириш кафолати бўлмаса, шунча кўп пул сарфлашга рози бўлмайди”, — деди сиёсатчи.
Шунингдек, Қирғизистон президенти пансионатлар “Кампирободга ўхшаб бериб юборилаётгани” ҳақидаги танқидларга муносабат билдирди.
“Кампирободни бердилар, деб жар солаётганларни нодонлар дейиш мумкин. Уни ҳеч кимга бермадик, аксинча, олдик. Биз уни тенг асосда бошқариш учун шартнома туздик ва 50 фоизини ўзимизга олдик.
Илгари Кампирободнинг 50 метр нарисига ҳам қўйишмасди, тўғрими? Ҳар бир қароримиз учун ҳатто 50 йилдан кейин ҳам жавоб беришга тайёрмиз. Бизнинг ишимиз тўлиқ халқ манфаати учун қилинади. Шу боис ҳар қандай ҳолатда ҳам резонанс келтириб чиқаришга интилаётган айрим сайтларнинг маълумотларига эътибор бермасликни сўрайман”, — дея хулоса қилди Садир Жапаров.
Ўзбекистоннинг Иссиқкўлдаги собиқ пансионатлари
2016 йилда Темир Сариев бошчилигидаги Қирғизистон ҳукумати Иссиқкўлда Ўзбекистонга тегишли бўлган тўртта пансионат: “Роҳат-NBU” (кейинчалик (Алтин-Жай деб ўзгартирилди), “Олтин қум” (кейинчалик Бостери), “Дилором” (кейинчалик Эне-сай) ва Бўстон (номи сақланиб қолган) пансионатларини миллийлаштиришга қарор қилди.
Ўзбекистон ҳолат юзасидан АҚШдаги халқаро арбитражга даъво аризаси берди. Тошкент қирғиз томонини собиқ СССР давлатлари ўртасида Иттифоқ парчаланганидан кейин бошқа республика ҳудудида қолиб кетган объектлардан фойдаланиш бўйича 1992 йилда имзоланган келишувни бузган, деб ҳисоблайди.
2017 йил декабрида Сапар Исоқов бошчилигидаги Қирғизистон ҳукумати Бишкек тўртта пансионатни Ўзбекистонга беришга қарор қилгани, бироқ ерни ўзида сақлаб қолаётгани ҳақида хабар берди. Бунинг эвазига Ўзбекистон пансионатларга сармоя киритиши ва халқаро арбитраждан даъвосини қайтариб олиши керак эди. Аммо томонлар ўртасида келишув имзоланмагани маълум қилинди.
Изоҳ (0)