Issiqko‘ldagi ko‘chmas mulklar xorijliklarga sotiladi. Qonun loyihasi Qirg‘izistonning Jogorku Kenesh deputatlari tomonidan ma’qullandi. Bu haqda 24.kg xabar berdi.
Xorijiy fuqarolarga mulkchilik shaklidan va tadbirkorlik faoliyatining huquqiy shaklidan qat’i nazar, Issiqko‘lning biosfera hududida joylashgan, dam olish xizmatlarini ko‘rsatuvchi pansionatlar, dam olish maskanlari, uylar, kottejlar va boshqa obyektlarni sotib olishga ruxsat beriladi. Parlamentda ko‘plab bahs-munozaralarga sabab bo‘lgan qonun loyihasi Jogorku Kenesh tomonidan uchinchi o‘qishda qabul qilindi.
Hujjat muallifi deputat Balbak Tuloboyevning ta’kidlashicha, amaldagi qonunchilikka asosan xorijliklar sarmoyaviy jozibador bo‘lgan rekreatsiya obyektlariga egalik qila olmaydi.
Shu bilan birga, innovatsion kurort, dam olish maskanlarini qurish, zamon bilan hamnafas bo‘ladigan prinsipial jihatdan yangi infratuzilmani yaratish zarurati mavjud.
Buni aholining turizm xizmatlariga bo‘lgan ehtiyojlarini qondira oladigan, daromad keltiruvchi va yangi ish o‘rinlari yarata oladigan yuqori rentabelli hamda raqobatbardosh turizm industriyasini shakllantirish orqali amalga oshirish mumkin.
O‘z navbatida, bu Issiqko‘l kurort-rekreatsion zonasini rivojlantirishga, jumladan, xorijiy investitsiyalarni jalb qilish bilan bevosita bog‘liqdir.
Qirg‘iziston Issiqko‘ldagi pansionatlarni o‘zbekistonlik investorlarga bermoqchi
2023-yil Qirg‘iziston Vazirlar Mahkamasi huzuridagi Davlat mulkini boshqarish davlat agentligi direktori Kanatbek Turg‘unbekov Issiqko‘ldagi sobiq “Dilorom” pansionati o‘zbekistonlik investorlarga foydalanishga topshirilishi mumkinligini aytgandi.
“Dilorom” (Ene-Say), “Oltin qum” (Bosteri) va “Rohat” (Altin-Jay) pansionatlarimizga sarmoya jalb qilish masalasi bor. Ya’ni ular sarmoya kiritadi va boshqaradi, — degandi Turg‘unbekov.
Qirg‘iziston tomoni har bir pansionat uchun 15-20 mln dollar miqdorida sarmoya kiritishni kutmoqda. Bundan tashqari Ozarbayjon bilan Issiqko‘l qirg‘og‘ida 5 yulduzli mehmonxona qurish rejasi ham bor.
O‘zbekistonning Issiqko‘ldagi sobiq pansionatlari
2016-yilda Temir Sariyev boshchiligidagi Qirg‘iziston hukumati Issiqko‘lda O‘zbekistonga tegishli bo‘lgan to‘rtta: “Rohat-NBU” (keyinchalik (Altin-Jay deb o‘zgartirildi), “Oltin qum” (keyinchalik Bosteri), “Dilorom” (keyinchalik Ene-say) va Bo‘ston (nomi saqlanib qolgan) pansionatlarini milliylashtirishga qaror qildi.
O‘zbekiston holat yuzasidan AQSHdagi xalqaro arbitrajga da’vo arizasi berdi. Toshkent qirg‘iz tomonini sobiq SSSR davlatlari o‘rtasida Ittifoq parchalanganidan keyin boshqa respublika hududida qolib ketgan obyektlardan foydalanish bo‘yicha 1992-yilda imzolangan kelishuvni buzgan, deb hisoblaydi.
2023-yilning may oyida sud Qirg‘iziston tomoni 40 million dollardan ortiq pul to‘lashi kerak, degan qarorga kelgan. Biz O‘zbekiston tomoni bilan muzokaralar olib bordik va obyektlarni 49 yilga ijaraga berishga, ularni to‘rt-besh yulduzli mehmonxonalar darajasiga ko‘tarishlari bo‘yicha kelishib oldik: ularga belgilangan summani to‘lashga imkonimiz yo‘q, — degandi Qirg‘iziston prezidenti Sadir Japarov.
Izoh (0)