Қирғизистон президенти Садир Жапаров Иссиқкўлдаги 15 та пансионат узоқ муддатли ижарага берилишини айтди. Бу ҳақда Sputnik хабар берди.
Жапаровнинг тушунтиришича, бу объектлар давлат ёки давлат идораларига тегишли, бироқ анчадан бери ишламаяпти. Шу сабабли уларни 49 йилга ижарага бериш кўриб чиқилмоқда.
“Марҳамат, олинг. Уч-беш юлдузли меҳмонхоналар қуринг ва ишланг. Сармоянгиз қисқа вақт ичида ўзини оқлайди, дейишдан йироқман, лекин 49 йилдан кейин 3-4 баробар кўп фойда қайтиб келишига ишончим комил. Нега давлат пулига меҳмонхона қуриб бўлмайди, деб сўраган фуқароларни эшитдим.
Давлат пули бор, Худога шукур, сиз амалга оширилаётган ишларга гувоҳсиз. Бироқ бюджет маблағларини узоқ муддатли бизнесга инвестиция қилиш тавсия этилмайди. Биз ҳаммасини ҳисоб-китоб қилдик, шунинг учун қурмаймиз”, — деди Жапаров.
У бу таклифга қизиқувчиларни Давлат мулки агентлигига мурожаат қилишга чақирди. Фақат битта талаб бор: ижара учун пансионат олган инвестор дарҳол қурилишни бошлаши керак.
“Пулингиз бўлса, икки йилда ҳашаматли меҳмонхона қура оласиз. Ижарага олиб, ишни 5-10 йилга қолдириб бўлмайди. Субижарага ҳам тақиқ қўйилади”, — деди Қирғизистон президенти.
Ўзбекистоннинг Иссиқкўлдаги собиқ пансионатлари
2016 йилда Темир Сариев бошчилигидаги Қирғизистон ҳукумати Иссиқкўлда Ўзбекистонга тегишли бўлган тўртта пансионат: “Роҳат-NBU” (кейинчалик (Алтин-Жай деб ўзгартирилди), “Олтин қум” (кейинчалик Бостери), “Дилором” (кейинчалик Эне-сай) ва Бўстон (номи сақланиб қолган) пансионатларини миллийлаштиришга қарор қилди.
Ўзбекистон ҳолат юзасидан АҚШдаги халқаро арбитражга даъво аризаси берди. Тошкент қирғиз томонини собиқ СССР давлатлари ўртасида Иттифоқ парчаланганидан кейин бошқа республика ҳудудида қолиб кетган объектлардан фойдаланиш бўйича 1992 йилда имзоланган келишувни бузган, деб ҳисоблайди.
2017 йил декабрида Сапар Исоқов бошчилигидаги Қирғизистон ҳукумати Бишкек тўртта пансионатни Ўзбекистонга беришга қарор қилгани, бироқ ерни ўзида сақлаб қолаётгани ҳақида хабар берди. Бунинг эвазига Ўзбекистон пансионатларга сармоя киритиши ва халқаро арбитраждан даъвосини қайтариб олиши керак эди. Аммо томонлар ўртасида келишув имзоланмагани маълум қилинди.
Изоҳ (0)