Иссиқкўлдаги собиқ “Дилором” пансионати ўзбекистонлик инвесторларга фойдаланишга топширилиши мумкин. Бу ҳақда Қирғизистон Вазирлар Маҳкамаси ҳузуридаги Давлат мулкини бошқариш давлат агентлиги директори Канатбек Турғунбеков хабар берди.
Ўзбекистон бош вазири Абдулла Ариповнинг Қирғизистонга ташрифи доирасида Ўзбекистон делегацияси “Эне-Сай” (собиқ “Дилором”) пансионатига ташриф буюриб, уни кўздан кечирган.
Пансионатни инвесторлар ихтиёрига бериш режалаштирилган.
“Дилором” (Эне-Сай), “Олтин қум” (Бостери) ва “Роҳат” (Алтин-Жай) пансионатларимизга сармоя жалб қилиш масаласи бор. Яъни улар сармоя киритади ва бошқаради, — деди Турғунбеков.
Қирғизистон томони ҳар бир пансионат учун 15-20 млн доллар миқдорида сармоя киритишни кутмоқда.
Булар иш жойлари, 4-5 юлдузли меҳмонхоналар. Биз ҳаммасидан мамнунмиз. Улар келишсин, қуришсин, — дея қўшимча қилди у.
Давлат агентлиги директори Озарбайжон билан Иссиқкўл қирғоғида 5 юлдузли меҳмонхона қуриш бўйича қўшма лойиҳани ҳам эслади.
Энди пансионатларни фақат фойдаланиш учун берамиз. Иссиқкўлни ҳеч кимга бера олмаймиз, — дея хулоса қилди у.
Ўзбекистоннинг Иссиқкўлдаги собиқ пансионатлари
2016 йилда Темир Сариев бошчилигидаги Қирғизистон ҳукумати Иссиқкўлда Ўзбекистонга тегишли бўлган тўртта пансионат: “Роҳат-НБУ” (кейинчалик (Алтин-Жай деб ўзгартирилди), “Олтин қум” (кейинчалик Бостери), “Дилором” (кейинчалик Эне-сай) ва Бўстон (номи сақланиб қолган) пансионатларини миллийлаштиришга қарор қилди.
Ўзбекистон ҳолат юзасидан АҚШдаги халқаро арбитражга даъво аризаси берди. Тошкент қирғиз томонини собиқ СССР давлатлари ўртасида Иттифоқ парчаланганидан кейин бошқа республика ҳудудида қолиб кетган объектлардан фойдаланиш бўйича 1992 йилда имзоланган келишувни бузган, деб ҳисоблайди.
2017 йил декабрида Сапар Исоқов бошчилигидаги Қирғизистон ҳукумати Бишкек тўртта пансионатни Ўзбекистонга беришга қарор қилгани, бироқ ерни ўзида сақлаб қолаётгани ҳақида хабар берди. Бунинг эвазига Ўзбекистон пансионатларга сармоя киритиши ва халқаро арбитраждан даъвосини қайтариб олиши керак эди. Аммо томонлар ўртасида келишув имзоланмагани маълум қилинди.
Изоҳ (0)