Исмини ошкор этмаган исроиллик мулозим ҲАМАС гаровга олинганларни озод қилиш таклифини рад этганини айтди. Бу ҳақда Reuters хабар берди.
Тегишли таклиф АҚШ президенти Жо Байденнинг БМТ Хавфсизлик кенгаши томонидан қабул қилинган Ғазо секторида ўт очишни тўхтатиш режасининг бир қисми эди.
“11 июнь тунда Исроил воситачи орқали ҲАМАСнинг жавобини олди. Фаластин ҳаракати ўз жавобида гаровга олинганларни озод қилиш бўйича президент Байден томонидан тақдим этилган таклифни рад этди. Улар барча асосий ва энг муҳим параметрларни ўзгартириб юборди”, — дейди исмини ошкор этишни хоҳламаган Исроил расмийси.
Аввалроқ ҲАМАС БМТ Хавфсизлик кенгаши томонидан қабул қилинган резолюцияни олқишлаган баёнотини эълон қилганди. Хавфсизлик кенгаши Ғазо секторида босқичма-босқич ўт очишни тўхтатиш режасини ўз ичига олган АҚШ резолюциясини қабул қилди. Резолюция учун 15 давлатдан 14 таси овоз берди, Россия бетараф қолди.
Ҳужжат ўт очишни тўхтатиш, ҲАМАС томонидан гаровга олинганларни озод қилиш ва Исроил армиясини сектордан олиб чиқиб кетишни талаб қилади. Шунингдек, Ғазодаги демографик ёки ҳудудий ўзгаришларни рад этади.
Изоҳ (0)