Ismini oshkor etmagan isroillik mulozim HAMAS garovga olinganlarni ozod qilish taklifini rad etganini aytdi. Bu haqda Reuters xabar berdi.
Tegishli taklif AQSH prezidenti Jo Baydenning BMT Xavfsizlik kengashi tomonidan qabul qilingan G‘azo sektorida o‘t ochishni to‘xtatish rejasining bir qismi edi.
“11-iyun tunda Isroil vositachi orqali HAMASning javobini oldi. Falastin harakati o‘z javobida garovga olinganlarni ozod qilish bo‘yicha prezident Bayden tomonidan taqdim etilgan taklifni rad etdi. Ular barcha asosiy va eng muhim parametrlarni o‘zgartirib yubordi”, — deydi ismini oshkor etishni xohlamagan Isroil rasmiysi.
Avvalroq HAMAS BMT Xavfsizlik kengashi tomonidan qabul qilingan rezolyutsiyani olqishlagan bayonotini e’lon qilgandi. Xavfsizlik kengashi G‘azo sektorida bosqichma-bosqich o‘t ochishni to‘xtatish rejasini o‘z ichiga olgan AQSH rezolyutsiyasini qabul qildi. Rezolyutsiya uchun 15 davlatdan 14 tasi ovoz berdi, Rossiya betaraf qoldi.
Hujjat o‘t ochishni to‘xtatish, HAMAS tomonidan garovga olinganlarni ozod qilish va Isroil armiyasini sektordan olib chiqib ketishni talab qiladi. Shuningdek, G‘azodagi demografik yoki hududiy o‘zgarishlarni rad etadi.
Izoh (0)