Исроил бош вазири Биньямин Нетаньяху ҲАМАС ташкилоти йўқ қилинмагунча Ғазо секторида ўт очиш тўхтамаслигини маълум қилди. Бу ҳақда бош вазир матбуот йиғилишида эълон қилган баёнотга асосланиб, Al Arabiya нашри хабар берган.
Исроил бош вазирининг баёноти АҚШ президенти Жо Байден таклиф этган тинчлик лойиҳасидан сўнг кўтарилгани маълум қилинган. Тель-Авив раҳбарияти ҳар қандай сулҳ битими душман йўқ қилингач, амалга ошишини билдирган.
Президент Байден 31 май куни Исроил қўшинларини Ғазодан қисман олиб чиқиб кетиш ва баъзи гаровга олинганларни озод қилиш ортидан олти ҳафталик сулҳ имзолашни ўз ичига олган келишувни таклиф этган эди. Ушбу сулҳ режасида уришувчи томонлардан ҳарбий ҳаракатларни бутунлай тугатиш бўйича муросага келиш сўралган.
Исроил раҳбарининг сўнгги кескин баёноти музокараларни ҳали яна анча пайтгача чўзиши хабар қилинган. Олдинроқ таҳлилчилар ҳам ҳарбий ҳаракатлар 2024 йил давомида тўхтамаслиги мумкинлигини айтишган эди.
ҲАМАС 31 май куни “ижобий ва конструктив тарзда” ҳамкорлик қилишга тайёрлигини айтган. Бироқ агар Исроил келишувларга қайтмаса, отишмалар тўхтатилмаслиги қўшимча қилинган.
“Босқинчи армияни олиб чиқиб кетиш ва отишмани тўхтатиш талаби бажарилмагунча ҳеч қандай келишув бўлмайди”, — деган ҲАМАСнинг Қатардаги сиёсий бюроси вакили Маҳмуд Мардавий.
Изоҳ (0)